ఖమ్మం కార్పొరేషన్, వెలుగు: వర్షాకాలం నేపథ్యంలో వరద ముప్పు పొంచివుండే ప్రాంతాలను ముందుగానే గుర్తించి, తగిన చర్యలు తీసుకోవాలని ఖమ్మం మున్సిపల్ కమిషనర్ అభిషేక్ అగస్త్య ఆదేశించారు. కార్పొరేషన్ కార్యాలయంలో మంగళవారం అధికారులతో సమీక్ష నిర్వహించారు. గతేడాది వరదల అనుభవాన్ని దృష్టిలో పెట్టుకొని, ఈసారి మరింత మెరుగైన ప్రణాళిక రూపొందించనున్నట్లు తెలిపారు.
వరద ముప్పు ప్రాంతాలున్న ప్రతీ డివిజన్కు ప్రత్యేకంగా ఇన్చార్జి ఆఫీసర్లను నియమించనున్నట్లు పేర్కొన్నారు. వారితోపాటు వార్డ్ ఆఫీసర్, శానిటరీ సూపర్వైజర్లు తమ పరిధిలోని ప్రతి ఇంటికి వెళ్లి, వివరాలు సేకరించాలన్నారు. వారంలోగా ఈ గ్రౌండ్ వర్క్ పూర్తి చేయాలని సూచించారు. వరదల సమయంలో ప్రజలకు తాత్కాలికంగా ఆశ్రయం కల్పించేందుకు అవసరమైన రిహాబిలిటేషన్ సెంటర్లు ఏర్పాటు చేయనున్నట్లు చెప్పారు. మున్సిపల్, ఇంజినీరింగ్, టౌన్ ప్లానింగ్ అధికారులు పాల్గొన్నారు.
