- ప్రసార మాధ్యమాల ప్రకటనలపై నిఘా పెట్టాలి
- సాధారణ ఎన్నికల పరిశీలకులు ఖర్తడే కాళీచరణ్ సుదామరావు
- కలెక్టరేట్ లో ఏర్పాటు చేసిన కంట్రోల్ రూమ్, మీడియా సెంటర్ పరిశీలన
ఖమ్మం టౌన్, వెలుగు : ఎన్నికల విధులను అధికారులు ప్రణాళికాబద్ధంగా నిర్వహించాలని సాధారణ ఎన్నికల పరిశీలకులు ఖర్తడే కాళీచరణ్ సుదామ రావు సూచించారు. పంచాయతీ ఎన్నికల సందర్భంగా కలెక్టరేట్ లో ఏర్పాటు చేసిన కంట్రోల్ రూమ్, ఎంసీఎంసీ సెల్, మీడియా సెంటర్లను ఖమ్మం కలెక్టర్ అనుదీప్ దురిశెట్టి, పోలీస్ కమిషనర్ సునీల్ దత్ తో కలిసి ఆయన శుక్రవారం పరిశీలించారు. ఈ సందర్భంగా మాట్లాడుతూ ప్రతి ఒక్కరూ ఎన్నికల ప్రవర్తన నియమావళిని పాటించాలన్నారు. 1077 టోల్ ఫ్రీ నెంబర్, ఎలక్ట్రానిక్ మీడియా మానిటరింగ్ సెల్ నుంచి వచ్చే ఫిర్యాదులను వెంటనే చర్యలు చేపట్టాలని సూచించారు.
ఫ్లయింగ్ స్క్వాడ్ బృందాలు, స్టాటిక్ సర్వేలైన్స్ బృందాల వివరాలను నోటీస్ బోర్డు ఉంచాలన్నారు. సోషల్ మీడియాలో వచ్చే పోస్టులపై ప్రత్యేక దృష్టిసారించాలని చెప్పారు. కలెక్టర్ మాట్లాడుతూ వచ్చే ప్రతీ ఫిర్యాదును రిజిస్టర్ లో నమోదు చేసుకుని వెంటనే ఫ్లయింగ్ స్క్వాడ్, స్టాటిక్ సర్వేలెన్సు బృందాలకు సమాచారం అందించాలన్నారు. అడిషనల్ కలెక్టర్ డాక్టర్ పి. శ్రీజతో కలిసి పంచాయతీ ఎన్నికల నిర్వహణపై ఎన్నికల నోడల్ అధికారులతో సమీక్షించారు. జిల్లాలో పంచాయతీ ఎన్నికలు సజావుగా, స్వేచ్ఛగా జరిగేలా చూడాలన్నారు. ప్రభుత్వ ఉద్యోగులు, సిబ్బంది ఎక్కడా కూడా ఎన్నికల ప్రచారంలో భాగస్వామ్యం కావద్దని సూచించారు. అనంతరం ఎన్నికల సిబ్బంది శిక్షణ, బ్యాలెట్ పేపర్, ప్రింటింగ్ మెటీరియల్ తదితర అంశాలను తెలుసుకున్నారు.
ఎన్నికల్లో పోటీ చేసే ప్రతీ అభ్యర్థి నుంచి ఎన్నికలు ముగిసిన 45 రోజుల లోపు వ్యయం వివరాలు సేకరించేలా చర్యలు తీసుకోవాలని కలెక్టర్ సూచించారు. ఎక్కడ ఎటువంటి సంఘటనలు జరగకుండా ప్రశాంతంగా ఎన్నికలు జరిగేందుకు పటిష్ట బందోబస్తు ఏర్పాటు చేసినట్లు సీపీ తెలిపారు. ఈ సమావేశంలో కల్లూరు సబ్ కలెక్టర్ అజయ్ యాదవ్, డీఆర్ఓ పద్మశ్రీ, జడ్పీ సీఈఓ దీక్షా రైనా, డీఆర్డీఓ సన్యాసయ్య, డీపీఓ ఆశాలత, డీపీఆర్ఓ ఎంఏ గౌస్, జిల్లా యువజన క్రీడా శాఖ అధికారి టి. సునీల్ రెడ్డి, డీఈఓ చైతన్య జైని, సీపీఓ శ్రీనివాస్, ఆర్టీఓ వెంకట రమణ, డీసీఓ గంగాధర్, ఆర్డీఓ నరసింహా రావు తదితరులు పాల్గొన్నారు.
నామినేషన్ స్వీకరణ ప్రక్రియ పరిశీలన
అనంతరం వారు రఘునాథపాలెం మండలంలోరి చిమ్మపూడి, కోయచెలక గ్రామ పంచాయతీ కార్యాలయంలో మొదటి విడత పంచాయతీ ఎన్నికల నామినేషన్ స్వీకరణ ప్రక్రియను తనిఖీ చేసి పలు సూచనలు చేశారు. ప్రశాంత వాతావరణంలో ఎన్నికలు జరిగేలా చూడాలని, ఎన్నికల విధుల పట్ల అధికారులు అలర్ట్గా ఉండాలన్నారు.
