నగరాల్లో అత్యంత సాధారణంగా కనిపించే అతి తీవ్ర సమస్య ట్రాఫిక్. ఇరుకు దారులు, రూల్స్ బ్రేక్ చేసేవాళ్లు, అడ్డదిడ్డంగా చేసే పార్కింగ్ వంటివి ట్రాఫిక్ కష్టాలు పెంచుతాయి. అయితే, ఇలాంటివాటన్నింటికీ మూలకారణం మాత్రం రవాణాశాఖ ఇంజినీర్లే అంటున్నాడు అలెగ్జాండర్ క్రిలటోవ్! రష్యాలోని సెయింట్ పీటర్స్బర్గ్ యూనివర్సిటీలో లెక్కల ప్రొఫెసర్గా పనిచేస్తున్నాడు ఈయన.
ట్రాఫిక్ సమస్యకు ముఖ్య కారణం ఇంజినీర్లకు ప్లానింగ్ లేకపోవడమే అంటున్నాడు క్రిలటోవ్. ‘‘ఎక్కడైనా ఒకచోట ట్రాఫిక్ ఇబ్బంది తప్పించినప్పటికీ అది తాత్కాలికమే. ఆ సమస్య మరో దగ్గర తలెత్తుతుంది. దీనికి కారణం ప్లానింగ్ సరిగా లేకపోవడమే. ఆ సమస్య నుంచి బయటపడాలంటే గణితం సాయపడుతుంది” అంటున్నాడు ఆయన. పరిష్కార మార్గాలు కూడా సూచిస్తున్నాడు. ఒకే నేవిగేషన్ సిస్టమ్ ఉపయోగించడం. అంటే వేర్వేరు నేవిగేషన్ సెంటర్ల నుంచి వచ్చే సూచనలు కాకుండా ఏదైనా ఒకే హబ్ నుంచి వ్చే వాటినే డ్రైవర్లు ఫాలో కావాలి. చాలా నగరాల్లో దారులు మరీ ఇరుకుగా ఉంటాయి. వాటిని విస్తరించడం కుదరదు. ఇలాంటి రోడ్లలో అక్కడక్కడా కనిపించే పార్కింగ్ ప్లేస్లను తీసేసి వాటిని లేన్లుగా మార్చాలి.
విద్యుత్తో నడిచే వెహికల్స్కు ప్రత్యేక మార్గం(గ్రీన్ లేన్స్) కేటాయించాలి. ఇలా చేయడం వల్ల ఆ వెహికల్స్ సంఖ్య పెరిగే అవకాశం ఉంది. ట్రాఫిక్ పెరిగినా దానికి తగ్గట్టు సౌకర్యాలు లేనప్పడు డిజిటల్ మోడలింగ్ పద్ధతి ద్వారా వాటిని సమన్వయం చేయొచ్చు. ఈ సాఫ్ట్వేర్ రవాణాశాఖ ఇంజినీర్లకు ఉపయోగపడుతుంది. నిజానికి ట్రాఫిక్ మోడలింగ్ అనేది సంక్లిష్ట ప్రక్రియ. దీన్ని పెట్టినా డ్రైవర్లు ఇష్టారాజ్యంగా వెహికల్స్ నడిపితే ప్రయోజనం శూన్యం. అయితే, ‘ప్రతి సంవత్సరం రోడ్ల అభివృద్ధికి ప్రభుత్వాలు నిధులు కేటాయిస్తాయి. వాటిని సమర్థంగా వాడుకోవడంలో మేం చెప్పిన పద్ధతులు కొంతమేర ఉపయోగపడొచ్చు’ అంటున్నాడు అలెగ్జాండర్ క్రిలటోవ్. ఈ పద్ధతేదో బాగుంటుంది అనుకుంటే.. మన దగ్గరా వాడితే బాగుంటుంది కదా.
