ఉమ్మడి కరీంనగర్ జిల్లాలో చివరి రోజు నామినేషన్ల జోరు..

• ఉమ్మడి జిల్లాలో అర్ధరాత్రి వరకు క్యూలైన్లలో అభ్యర్థులు
• సాయంత్రం 5 గంటలలోపు సెంటర్లకు వచ్చిన వారికి అవకాశం
• నేడు నామినేషన్ల పరిశీలన

కరీంనగర్, వెలుగు: ఉమ్మడి జిల్లా వ్యాప్తంగా మొదటి దశలో సర్పంచ్, వార్డు మెంబర్ స్థానాలకు ఎన్నికలు జరిగే గ్రామ పంచాయతీల్లో ఈ నెల 27న ప్రారంభమైన నామినేషన్ల స్వీకరణ ప్రక్రియ శనివారం ముగిసింది. మొదటి రెండు రోజులు అంతంతమాత్రంగా నామినేషన్లు దాఖలు కాగా.. చివరి రోజు ఎక్కువ మంది వేశారు. క్యాస్ట్ సర్టిఫికెట్, బ్యాంక్​ అకౌంట్‌‌‌‌ తీసుకోవడంలో జరిగిన జాప్యమే ఇందుకు కారణమని అధికారులు చెప్పారు. శనివారం రాత్రి వరకూ నామినేషన్లు స్వీకరించారు. సాయంత్రం 5 గంటలలోపు నామినేషన్ సెంటర్లకు వచ్చిన అభ్యర్థులకు టోకెన్లు ఇచ్చి, అవకాశం కల్పించారు. 

కరీంనగర్​ జిల్లాలో 92 జీపీలకు..

జిల్లాలో మొదటి దశలో ఎన్నికలు జరిగే 92 గ్రామ పంచాయతీల్లో మొదటి రోజు 92, రెండో రోజు 197, చివరి రోజు శనివారం 560(రామడుగు మినహా) నామినేషన్లు దాఖలయ్యాయి. మూడు రోజుల్లో కలిపి మొత్తం 1,000కి పైగా నామినేషన్లు వచ్చినట్లు తెలిసింది. అలాగే, 866 వార్డు మెంబర్ స్థానాలకు 2,500కు పైగా నామినేషన్లు వేసినట్లు అంచనా. గంగాధర మండలంలోని 33 పంచాయతీల్లో కలిపి 266, కరీంనగర్ రూరల్ మండలంలోని 14 గ్రామాల్లో 102, కొత్తపల్లి మండలంలోని 6 గ్రామాల్లో 68, చొప్పదండి మండలంలోని 16 గ్రామాల్లో 124 నామినేషన్లు దాఖలయ్యాయి. రామడుగు మండలంలో అర్ధరాత్రి వరకు నామినేషన్లు స్వీకరించారు.

పెద్దపల్లి జిల్లాలో అర్ధరాత్రి వరకు..

పెద్దపల్లి: మంథని, ముత్తారం మండలాల్లోని పలు గ్రామాల్లో శనివారం అర్ధరాత్రి వరకు నామినేషన్ల ప్రక్రియ పూర్తి కాలేదు. మంథని మండలం గద్దలపల్లి, వెంకటాపూర్, ఎక్లాస్​పూర్ క్లస్టర్లలో, ముత్తారం మండలంలోని ఖమ్మంపల్లి, కేశనపల్లి, ముత్తారం క్లస్టర్ల వద్ద సర్పంచ్, వార్డు స్థానాలకు నామినేషన్​వేసేవారు క్యూలైన్లలో బారులుదీరారు.  

దేశాయిపేటలో ఏకగ్రీవం

చొప్పదండి, వెలుగు: దేశాయిపేట గ్రామ పంచాయతీ సర్పంచ్, వార్డు స్థానాలు ఏకగ్రీవమయ్యాయి. ఇక్కడ సర్పంచ్ బీసీ మహిళకు రిజర్క్​కాగా.. వడ్లకొండ తిరుమల కొమురయ్య ఒక్కరే శనివారం రెండు సెట్ల నామినేషన్లు దాఖలు చేశారు. ఆమె ఏకగ్రీవంగా ఎన్నికైనట్లు ఎన్నికల అధికారి ప్రకటించాల్సి ఉంది. అలాగే ఏకగ్రీవంగా ఎన్నికైన వార్డు సభ్యులంతా కలిసి సింగిరెడ్డి ప్రవీణ్ రెడ్డిని ఉప సర్పంచ్ గా ఎన్నుకునేందుకు నిర్ణయించినట్లు తెలిసింది. గ్రామంలో కొత్తగా నిర్మించనున్న శివాలయానికి ఆర్థికసాయం అందిస్తే సర్పంచ్, ఉప సర్పంచ్, వార్డు సభ్యులను ఏకగ్రీవం చేస్తామని గ్రామస్తులు తీర్మానించారు.

దీంతో రూ.22.5‌‌‌‌‌‌‌‌ లక్షలు, ఉప సర్పంచ్ పదవికి రూ.2 లక్షలు, వార్డు మెంబర్ కింద మరో రూ.70 వేలు, మిగతా వార్డు మెంబర్లు రూ.50 వేల నుంచి రూ.లక్ష వరకు ఇచ్చేందుకు ఒప్పుకోవడంతో ఆయా స్థానాలు ఏకగ్రీవమయ్యాయి. 2006–11లోనూ ఈ గ్రామం ఏకగ్రీవమైంది. నిర్మల్ పురస్కార్ పథకం కింద రూ.5 లక్షలు ఫండ్ వచ్చింది. ఈ నిధులతో గ్రామంలో వాటర్ ప్లాంట్ తోపాటు మరికొన్ని అభివృద్ధి పనులు చేసుకున్నారు.  

రాజన్నసిరిసిల్ల జిల్లాలో..

రాజన్న సిరిసిల్ల: రుద్రంగి మండలంలోని 10 గ్రామ పంచాయతీల్లో సర్పంచ్ ​స్థానాలకు 39 మంది, 86 వార్డులకు 109 మంది నామినేషన్​వేశారు. చందుర్తి మండలంలో 19 సర్పంచ్ స్థానాలకు 111 మంది, 174 వార్డు స్థానాలకు 394 నామినేషన్లు దాఖలయ్యాయి. వేములవాడ అర్బన్ మండలంలోని 11 సర్పంచ్​స్థానాలకు 87 మంది, 104 వార్డు స్థానాలకు 270 మంది నామినేషన్లు వేశారు. వేములవాడ రూరల్ మండలంలో 17 సర్పంచ్​స్థానాలకు 98 మంది, 146 వార్డు స్థానాలకు 335 నామినేషన్లు దాఖలయ్యాయి. కోనరావుపేట మండలంలో నామినేషన ప్రక్రియ అర్ధరాత్రి వరకూ కొనసాగింది.

జగిత్యాలలో సర్పంచ్ ​స్థానాలకు 749 నామినేషన్లు

జగిత్యాల, వెలుగు: జిల్లాలో మొదటి విడతలో ఎన్నికలు జరిగే 122 గ్రామ పంచాయతీల్లో సర్పంచ్, వార్డు సభ్యుల స్థానాలకు చివరి రోజు పెద్ద ఎత్తున నామినేషన్లు దాఖలయ్యాయి. మూడో రోజు రాత్రి 10 గంటల వరకు మొత్తం 749 నామినేషన్లు వేశారు. వార్డు సభ్యుల స్థానాలకు 2,459 నామినేషన్లు దాఖలయ్యాయి.