జీడిమెట్ల, వెలుగు: కుత్బుల్లాపూర్ టీఆర్ఎస్ పార్టీలో వర్గపోరు నడుస్తోంది. నియోజకవర్గాన్ని అభివృద్ధి చేయడంలో పోటీపడాల్సిన లీడర్లు పూర్తిచేసిన వాటిని ప్రారంభించేందుకు పోటీ పడుతున్నారు. క్రెడిట్ అంతా తమకే దక్కాలనే ఆలోచనతో అధికార పార్టీ లీడర్లు ఒకే పనిని విడివిడిగా ప్రారంభించి నవ్వుల పాలవుతున్నారు. ఈ క్రమంలో వారి మధ్య ఉన్న విబేధాలు బయటపడుతున్నాయి.
నియోజకవర్గంలో టీఆర్ఎస్కు ఇద్దరు ముఖ్య నేతలు ఉండగా వారిలో ఒకరు ఉద్యమనేత, ఎమ్మెల్సీ శంభీపూర్రాజు, ఇంకొకరు ఎమ్మెల్యే వివేకానంద్. అయితే మొదట నుంచి ఇదే పార్టీలో ఉన్న శంభీపూర్రాజు వర్గానికి, టీడీపీ నుంచి వచ్చిన వివేకానంద్వర్గానికి మొదట నుంచి పొసగట్లేదు. ఆ దూరం పెరుగుతూ వస్తోంది. ఎమ్మెల్యే వివేకానంద్ఏ కార్యక్రమం తలపెట్టినా 90 శాతం మంది లీడర్లు హాజరవుకావడం లేదు. ఎమ్మెల్సీ శంభీపూర్ రాజు కార్యక్రమాలకు మాత్రం తప్పకుండా వస్తున్నారు. ఇటీవల సుభాష్నగర్ డివిజన్(130)లో రూ.కోటిపైగా నిధులతో రోడ్డు, పార్కులు అభివృద్ధి చేశారు. ఈ నెల 10వ తేదీన మాజీ కార్పొరేటర్, ప్రస్తుత కార్పొరేటర్ భర్త సురేశ్రెడ్డి పనులు పూర్తయిన వాటిని ప్రారంభించారు. కాగా వాటినే ఎమ్మెల్యే వివేకానంద్ సోమవారం తన అనుచరులతో కలిసి ప్రారంభించారు. అధికార పార్టీ లీడర్లే ఎవరికివారు రెండుసార్లు ప్రారంభించడం ఏమిటని జనం ముక్కున వేలేసుకుంటున్నారు.
