- ఇప్పటికి 72 వేల టన్నుల కొనుగోలు
- కమిషనర్ ఆదేశాలతో పెరిగిన వేగం
- రోజూ 380 లారీల ద్వారా వడ్ల తరలింపు
- కలెక్టర్, అడిషనల్ కలెక్టర్ మానిటరింగ్
- 15 రోజుల్లో సెంటర్లు క్లోజ్ చేసేలా చర్యలు
మంచిర్యాల, వెలుగు: మంచిర్యాల జిల్లాలో కొద్దిరోజులపాటు స్లోగా సాగిన ధాన్యం సేకరణ స్పీడ్ అందుకుంది. వరికోతలు లేట్కావడం, అకాల వర్షాలు పడుతుండడంతో ఉన్నతాధికారుల ఆదేశాల మేరకు కొనుగోళ్ల ప్రక్రియను స్పీడప్చేశారు. సివిల్ సప్లయీస్ కమిషనర్ డీఎస్ చౌహాన్ప్రతిరోజు ఉదయం 9 గంటలకు అన్ని జిల్లాల అధికారులతో టెలీకాన్ఫరెన్స్ నిర్వహిస్తూ కొనుగోళ్ల తీరును స్వయంగా మానిటరింగ్ చేస్తున్నారు. అడిషనల్కలెక్టర్లతో పాటు సంబంధిత అధికారులతో మాట్లాడుతూ డెయిలీ ప్రోగ్రెస్ను తెలుసుకుంటున్నారు. అవసరమైన ఆదేశాలు జారీ చేస్తున్నారు. కలెక్టర్ కుమార్దీపక్, అడిషనల్కలెక్టర్, సంబంధిత అధికారులు మార్కెటింగ్ఆఫీసర్తో రోజూ సాయంత్రం ధాన్యం కొనుగోళ్లపై రివ్యూ చేస్తున్నారు. అకాల వర్షాల వల్ల రైతులకు నష్టం జరగకుండా చర్యలు తీసుకోవాలంటూ అలర్ట్ చేస్తున్నారు. ఫలితంగా జిల్లాలో ధాన్యం కొనుగోళ్ల ప్రక్రియ స్పీడ్ అయ్యింది.
రోజూ 4 వేల నుంచి 6 వేల టన్నుల కాంటా
జిల్లాలో ఈ ఏడాది యాసంగి సీజన్లో 1.20 లక్షల ఎకరాల్లో వరిపంట సాగైంది. 3.30 లక్షల మెట్రిక్టన్నుల ధాన్యం దిగుబడి వస్తుందని అగ్రికల్చర్ఆఫీసర్లు అంచనా వేసినప్పటికీ దిగుబడి తగ్గే అవకాశాలు కనిపిస్తున్నాయి. దీంతో జిల్లావ్యాప్తంగా కొనుగోలు కేంద్రాల ద్వారా 2.21 లక్షల టన్నుల ధాన్యం సేకరించాలని టార్గెట్ పెట్టుకున్నారు. ఇందుకోసం 345 సెంటర్లను ఓపెన్ చేయగా, ఇప్పటివరకు 265 సెంటర్ల ద్వారా 76,301.16 మెట్రిక్ టన్నుల ధాన్యాన్ని 9,249 మంది రైతుల నుంచి కొనుగోలు చేశారు.
ప్రస్తుతం రోజుకు 4 వేల నుంచి 6 వేల టన్నులు కాంటా వేస్తున్నారు. నిర్దేశిత టార్గెట్ ప్రకారం ఇంకా 1.44 లక్షల టన్నుల ధాన్యం సేకరించాల్సి ఉంది. దీంతో కొనుగోళ్లు మరింత స్పీడప్ చేసి 10, 15 రోజుల్లోగా సెంటర్లను క్లోజ్ చేసేందుకు చర్యలు తీసుకుంటున్నారు.
మంచిర్యాల నియోజకవర్గంలో వరి కోతలు పూర్తికావడంతో మరో నాలుగైదు రోజుల్లో ధాన్యం సేకరణ ముగిసే అవకాశం ఉంది. దీంతో జన్నారం, దండేపల్లి, లక్సెట్టిపేట, హాజీపూర్ మండలాల్లోని సెంటర్లను ఈ నెల 15లోగా క్లోజ్ చేయాలని ఆదేశాలు జారీ చేశారు. చెన్నూర్, బెల్లంపల్లి నియోజకవర్గాల్లో కోతలు ఆలస్యం అవుతుండడంతో ధాన్యం కొనుగోళ్లు లేట్అవుతున్నాయని అధికారులు పేర్కొంటున్నారు. ఈ ప్రాంతంలోని జైపూర్, భీమారం, చెన్నూర్, కోటపల్లి, వేమనపల్లి, బెల్లంపల్లి, తాండూర్, కాసిపేట, భీమిని, కన్నెపల్లి, నెన్నెల మండలాల్లోని సెంటర్లకు ఈ నెల 25 వరకు గడువు ఇచ్చారు.
కరీంనగర్ జిల్లాకు తరలింపు
జిల్లాలో 19 బాయిల్డ్, 35 రా రైస్ మిల్లులున్నాయి. వీటిలో 23 మిల్లుల్లో దాదాపు రూ.130 కోట్ల విలువైన సీఎమ్మార్ పెండింగ్ ఉంది. దీంతో వీటిపై రెవెన్యూ రికవరీ (ఆర్ఆర్) యాక్ట్ ప్రయోగించి క్రిమినల్ కేసులు నమోదు చేశారు. సంబంధిత మిల్లులను ఈ సీజన్లో బ్లాక్ లిస్టులో చేర్చి ధాన్యం సరఫరా నిలిపివేశారు. ప్రభుత్వం విధించిన రూల్స్ ప్రకారం డిపాజిట్లు చెల్లించిన, బ్యాంక్ ష్యూరిటీ ఇచ్చిన 16 మిల్లులకు మాత్రమే ట్యాగింగ్ ఇచ్చారు. దీంతో మిగిలిన వడ్లను కరీంనగర్ జిల్లాలోని 56 మిల్లులకు కేటాయించారు.
ట్రాన్స్పోర్టేషన్ కోసం నాలుగు సెక్టార్లను ఏర్పాటుచేసి రోజుకు 380 లారీల ద్వారా ధాన్యాన్ని తరలిస్తున్నారు. మొన్నటివరకు అన్లోడింగ్కు నాలుగైదు రోజులు టైమ్పట్టింది. దీంతో హమాలీల సంఖ్యను పెంచి 24 గంటల్లోనే అన్లోడింగ్జరిగేలా చర్యలు తీసుకుంటున్నారు.
నాణ్యమైన ధాన్యం తీసుకొస్తే త్వరగా కొనుగోళ్లు పూర్తి
రైతులు అన్ని రకాల రూల్స్పాటిస్తూ నాణ్యమైన ధాన్యాన్ని సెంటర్లకు తీసుకొస్తే కొనుగోళ్ల ప్రక్రియ త్వరగా పూర్తవుతుంది. జిల్లాలోని 140 సెంటర్లలో ప్యాడీ క్లీనింగ్ మెషీన్లు అందుబాటులో ఉన్నప్పటికీ రైతులు వినియోగించుకోవడం లేదు. ధాన్యంలో తప్ప, తాలు తీయకుండానే సెంటర్లకు తీసుకురావడం, మాయిశ్చర్ రాకపోవడం వల్ల కాంటా లేట్ అవుతోంది. రైతులు త్వరగా కోతలు పూర్తిచేసి నాణ్యమైన ధాన్యం తీసుకురావాలి. గడువులోగా కొనుగోళ్లు పూర్తయ్యేందుకు సహకరించాలి.
సబావత్మోతీలాల్, అడిషనల్కలెక్టర్
