- ముందస్తు సమాచారంతో మోహరించిన పోలీసు బలగాలు
- తాళ్లపేటలో సద్దుల బతుకమ్మ సందర్భంగా మొదలైన గొడవ
- మూడు రోజులుగా కొనసాగుతున్న పోలీసుల పికెటింగ్
మంచిర్యాల, వెలుగు: మంచిర్యాల నియోజకవర్గ కాంగ్రెస్ పార్టీలో నెలకొన్న విభేదాలు బుధవారం జిల్లా కేంద్రంలో తీవ్ర ఉద్రిక్తతలకు దారితీశాయి. కాంగ్రెస్ సీనియర్ లీడర్ మంతన జగన్మోహన్రావుపై మరో వర్గం దాడికి ప్లాన్ చేసినట్టు ప్రచారం జరిగింది. దీంతో అలర్ట్ అయిన పోలీసులు బైపాస్ రోడ్డులోని జగన్మోహన్రావు నివాసం పరిసర ప్రాంతాలు, తెలంగాణ తల్లి విగ్రహం వద్ద ఉదయం నుంచే భారీగా సిబ్బందిని మోహరించారు. ఎలాంటి అవాంఛనీయ సంఘటనలు జరుగకుండా దాదాపు రెండు వందల మంది పోలీసులతో పికెటింగ్ ఏర్పాటు చేశారు.
వజ్ర వాహనాన్ని సైతం రెడీగా ఉంచారు. మంచిర్యాల, జైపూర్, బెల్లంపల్లి, గోదావరిఖని ఏసీపీలు, మంచిర్యాల, జైపూర్, మందమర్రి, బెల్లంపల్లి, గోదావరిఖని, మంథని సీఐలు, పలువురు ఎస్సైలతో బందోబస్తు నిర్వహించారు. జగన్మోహన్రావు నివాసం వైపు ఎవరూ వెళ్లకుండా బారికేడ్లు ఏర్పాటు చేసి రోడ్లను బ్లాక్ చేశారు. సమీపంలోని షాపులను బంద్ చేయించారు.
అదే సమయంలో మంచిర్యాలలోని ఓ ప్రజాప్రతినిధి నివాసం వద్దకు నియోజకవర్గంలోని నాయకులు, కార్యకర్తలు భారీ సంఖ్యలో చేరుకున్నారు. దీంతో ఎప్పుడేం జరుగుతుందోనని టెన్షన్ నెలకొంది. మరోవైపు రామగుండం పోలీస్ కమిషనర్అంబర్ కిశోర్ఝా, మంచిర్యాల డీసీపీ ఏ.భాస్కర్ ఎప్పటికప్పుడు పోలీసు అధికారులతో సమీక్ష జరుపుతూ పరిస్థితులు అదుపు తప్పకుండా చర్యలు తీసుకోవాలని ఆదేశించారు.
తాళ్లపేటలో ఘర్షణతో...
దండేపల్లి మండలం తాళ్లపేటలో ఆదివారం రాత్రి సద్దుల బతుకమ్మ సందర్భంగా మొదలైన ఘర్షణలే మంచిర్యాలలో హైటెన్షన్కు కారణమని తెలుస్తోంది. బతుకమ్మ ఆడుతున్న మహిళల వద్ద కాంగ్రెస్ లీడర్ దుర్గాప్రసాద్ పటాకులు కాల్చడంతో రెండు వర్గాల మధ్య ఘర్షణ చెలరేగింది. ఈ క్రమంలో పోలీసులు స్థానిక ఆదివాసీ మహిళా సర్పంచ్, ఉపసర్పంచ్లపై లాఠీచార్జి చేశారని ఆరోపణలు వచ్చాయి.
దీనికి నిరసనగా జగన్మోహన్రావు అదే రాత్రి తాళ్లపేటకు చేరుకొని ధర్నా చేపట్టారు. అనంతరం సోమవారం తాళ్లపేటలో రెండు వర్గాల మధ్య మరోసారి ఘర్షణ జరిగింది. ఈ కేసులో జగన్మోహన్రావు గ్రూపునకు చెందిన ఆరుగురిపై కేసు నమోదు చేసిన పోలీసులు అందులో నలుగురిని అరెస్టు చేశారు. వారిని మంచిర్యాల కోర్టులో హాజరుపర్చి రిమాండ్కు తరలించారు.
కాగా, జగన్మోహన్రావుతో పాటు ఆయన ముఖ్య అనుచరులను ముందస్తు చర్యల్లో భాగంగా అరెస్టు చేయాలంటూ నియోజకవర్గ ప్రజాప్రతినిధి పోలీసులపై ప్రెజర్ చేస్తున్నట్టు సమాచారం. ఈ పరిణామాలతో మంచిర్యాలలో ఎప్పుడేం జరుగుతుందనే టెన్షన్ నెలకొన్నది.
