భద్రాచలం, వెలుగు : తెలంగాణ, ఏపీ సరిహద్దులోని మన్యంలో సోమవారం మావోయిస్టుల బ్యానర్లు, కరపత్రాలు కనిపించాయి. మావోయిస్టు అమరవీరుల సంస్మరణ వారోత్సవాలు వేళ పోలీసులు విస్తృతంగా తనిఖీలు నిర్వహిస్తున్నారు. భద్రాద్రి కొత్తగూడెం, -అల్లూరి సీతారామరాజు పాడేరు జిల్లాల మావోయిస్టు పార్టీ కమిటీ పేరుతో చర్ల మండలం ఆర్.కొత్తగూడెంలో మావోయిస్టులు బ్యానర్లు కట్టి, కరపత్రాలను పడేశారు. గ్రామగ్రామాన వారోత్సవాలు, సభలు నిర్వహించాలని పిలుపునిచ్చారు. అమరులైన మావోయిస్టుల లీడర్లను స్మరించుకోవాలని సూచించారు.
ఆపరేషన్కగార్ను ప్రజా ఉద్యమాల ద్వారా ఓడిద్దామంటూ లేఖలో పేర్కొన్నారు. ఆపరేషన్సమాధాన్, సూరజ్కుండ్ వ్యూహాలు విఫలం కావడంతో కగార్పేరిట క్రూరమైన దాడులకు దిగుతున్నారని ఆరోపించారు. కదలికలను తెలుసుకునేందుకు పోలీసులు జిల్లాలోని మావోయిస్టు ప్రభావిత పోలీస్స్టేషన్ల పరిధిలో ఆంక్షలు విధించారు. బస్టాండ్లు, రహదారుల్లో ఆకస్మిక తనిఖీలు నిర్వహిస్తున్నారు. అనుమానితులను ప్రశ్నిస్తున్నారు. హిట్ లిస్టులో ఉన్న వారిపై నిఘా పెట్టారు. మావోయిస్టులు, పోలీసుల చర్యలతో ఏజెన్సీలో తీవ్ర భయాందోళన నెలకొంది.
