మిడ్జిల్ : మహబూబ్నగర్ జిల్లా మిడ్జిల్ ఎంపీపీ కాంతమ్మ పదవికి రాజీనామా చేశారు. జెడ్పీసీఈవో జ్యోతిని కలిసి రాజీనామా పత్రం అందజేశారు. వెలుగొమ్ముల, కొత్తూరు, మల్లాపూర్ గ్రామాల కాంగ్రెస్ అభ్యర్థిగా ఆమె గెలుపొందారు. 2019లో జరిగిన ఈ ఎన్నికల్లో మిడ్జిల్ మండలంలో మొత్తం 9 ఎంపీటీసీ స్థానాలకుగాను నలుగురు బీఆర్ఎస్, నలుగురు కాంగ్రెస్, బీజేపీ నుంచి ఒక అభ్యర్థి గెలుపొందారు. బీజేపీ సపోర్ట్తో కాంతమ్మ ఎంపీపీ పదవిని దక్కించుకున్నారు. ఎంపీపీగా ఎన్నికై ఏడాది తిరగకముందే మండలం అభివృద్ధి చెందాలనే సాకుతో కాంగ్రెస్ పార్టీకి రాజీనామా చేసి బీఆర్ఎస్ లో చేరారు. కొన్ని నెలల తర్వాత తనను భయభ్రాంతులకు గురిచేసి బీఆర్ఎస్ పార్టీలోకి చేర్చుకున్నారని ఆరోపిస్తూ మళ్లీ కాంగ్రెస్ లో చేరారు. ఇప్పుడు తాజాగా ఏడాది పదవి కాలం ఉండగానే ఎంపీపీ పదవికి రాజీనామా చేయడం చర్చనీయాంశంగా మారింది. ఆమె త్వరలో బీఆర్ఎస్ లో చేరబోతున్నారంటూ ప్రచారం సాగుతోంది. అయితే ఓ కాంట్రాక్టు , డబుల్ బెడ్రూం ఇల్లు కోసం ఆమె పదవిని అమ్ముకున్నారని కాంగ్రెస్ ఆరోపిస్తోంది.
