- సీఎం పర్యటన ఏర్పాట్లను పరిశీలించిన మంత్రి పొన్నం ప్రభాకర్
హుస్నాబాద్, వెలుగు: అభివృద్ధి దిశగా సీఎం రేవంత్ రెడ్డి పర్యటన ఉండనుందని మంత్రి పొన్నం ప్రభాకర్ తెలిపారు. శనివారం మంత్రి పొన్నం ప్రభాకర్స్థానిక అధికారులు, నాయకులతో కలిసి ఏర్పాట్లను పరిశీలించారు. అమరవీరుల స్తూపం వద్ద, గతంలో ప్రియాంకా గాంధీ పాల్గొన్న ప్రదేశంలోనే ఈ సభ జరుగనుంది. మంత్రి పొన్నం మాట్లాడుతూ.. ప్రభుత్వం రెండేళ్ల పాలన పూర్తి చేసుకున్న సందర్భంగా సభ నిర్వహిస్తున్నట్లు చెప్పారు.
సభకు వచ్చే ప్రజలకు అసౌకర్యం కలగకుండా భద్రత, మౌలిక సదుపాయాలు, పార్కింగ్ అంశాల్లో ప్రత్యేక జాగ్రత్తలు తీసుకోవాలని ఆదేశించారు. రెండేళ్ల ప్రభుత్వ ప్రగతిని ప్రజలకు తెలియజేయడం, హుస్నాబాద్ ప్రాంత అభివృద్ధి ప్రణాళికలను వివరించడం ఈ పర్యటన లక్ష్యం అన్నారు. విద్య, వైద్యం, పారిశ్రామికీకరణ, ఉపాధి అవకాశాలు, ఇరిగేషన్ వంటి రంగాల్లో హుస్నాబాద్ అభివృద్ధికి ప్రభుత్వం కృషి చేస్తోందన్నారు.
సీఎంతో పాటు కేబినెట్ మంత్రులంతా ఈ కార్యక్రమంలో పాల్గొంటారని చెప్పారు. హుస్నాబాద్ ప్రజలు భారీ సంఖ్యలో సభకు హాజరై విజయవంతం చేయాలని మంత్రి పిలుపునిచ్చారు. ఆయన వెంట రాష్ట్ర హౌజ్ ఫెడ్ మాజీ చైర్మన్ శ్రీరామ్ చక్రవర్తి, మున్సిపల్ కమిషనర్ మల్లికార్జున్, జిల్లా లైబ్రరీ చైర్మన్ లింగమూర్తి, తహసీల్దార్ లక్ష్మారెడ్డి, చందు, రవీందర్, వెంకటరమణ, పద్మ, సత్యనారాయణ, హాసన్, శ్రీనివాస్, ఉన్నారు.
హుస్నాబాద్ ఇంజనీరింగ్ కాలేజీకి రూ.35 కోట్లు రిలీజ్
హుస్నాబాద్ నియోజకవర్గ కేంద్రంలో ప్రారంభమైన శాతవాహన యూనివర్సిటీ ఇంజనీరింగ్ కాలేజీకి సంబంధించి నూతన భవనాల నిర్మాణాలు, క్యాంపస్ అభివృద్ధి పనుల కోసం రూ.35 కోట్లు విడుదల చేస్తూ శనివారం ప్రభుత్వం ఉత్తర్వులు జారీ చేసింది. ఈ సంవత్సరమే శాతవాహన యూనివర్సిటీ ఆధ్వర్యంలో హుస్నాబాద్లో ఇంజనీరింగ్ ప్రథమ సంవత్సరం తరగతులు ప్రారంభమైన విషయం తెలిసిందే.
విద్యార్థులకు శాశ్వత భవనాలు సిద్ధమయ్యే వరకు తాత్కాలికంగా మౌలిక సదుపాయాలు కల్పించేందుకు మంత్రి పొన్నం ప్రభాకర్ ప్రత్యేక చొరవ తీసుకున్నారు. ఈ నిధుల మంజూరుతో హుస్నాబాద్ ఇంజనీరింగ్ కాలేజీకి మెరుగైన శాశ్వత మౌలిక వసతులు, అత్యాధునిక సౌకర్యాలు సమకూరనున్నాయి. ప్రభుత్వ ఉత్తర్వులు వెలువడగానే, యూనివర్సిటీ విద్యార్థులు, స్థానికులు హర్షం వ్యక్తం చేశారు. మంత్రి పొన్నం ప్రభాకర్ కు ప్రత్యేక ధన్యవాదాలు తెలిపారు.
