- రూ. 220 కోట్లతో తాగునీటి పనులు
- ఖమ్మం నగరాన్ని శుభ్రంగా ఉంచుకోవాలి
- మంత్రి తుమ్మల నాగేశ్వరరావు
- పలు అభివృద్ధి పనులకు శంకుస్థాపన
ఖమ్మం టౌన్, వెలుగు : ఖమ్మం నగరంలో 24 గంటల పాటు తాగునీటి సరఫరాకు చర్యలు చేపట్టామని మంత్రి తుమ్మల నాగేశ్వరరావు తెలిపారు. శనివారం ఖమ్మం నగరంలో 35వ డివిజన్ లో పర్యటించి రూ.50.25 లక్షలతో చేపట్టిన సీసీ రోడ్డు నిర్మాణ పనులకు శంకుస్థాపన చేశారు. ఈ సందర్భంగా మంత్రి మాట్లాడుతూ అభివృద్ధి పనులు నాణ్యతగా చేపట్టాలన్నారు. నగరాన్ని శుభ్రంగా ఉంచుకునేందుకు ప్రతి ఒక్కరూ కృషి చేయాలని కోరారు.
అమృత్ పథకం కింద ఖమ్మం మున్సిపాలిటీకి రూ.220 కోట్లు మంజూరయ్యాయని, అధికారులు, ప్రజా ప్రతినిధులు కలిసి చేపట్టాల్సిన పనుల డీపీఆర్ తయారు చేయాలన్నారు. డిసెంబర్ లో అమృత్ పనులకు టెండర్ పిలిచి రాబోయే వేసవి కాలం నాటికి పనులు పూర్తి చేయాలన్నారు.
నగరంలో డ్రైయిన్ నిర్మాణం కోసం మరో రూ.200 కోట్ల పనులు జరుగుతున్నాయని చెప్పారు. ఖమ్మం ఖిల్లాకు రోప్ వే సౌకర్యం కల్పించి పర్యాటకంగా అభివృద్ధి చేసేందుకు చర్యలు చేపట్టామని, లకారం పక్కన శిల్పారామం నిర్మిస్తున్నామని, వెలుగు మట్ల అర్బన్ పార్క్ అభివృద్ధి చర్యలు చేపట్టామన్నారు.
ఈ కార్యక్రమంలో రాష్ట్ర గిడ్డంగుల సంస్థ చైర్మన్ రాయల నాగేశ్వరరావు, నగర మేయర్ పునుకొల్లు నీరజ, ఖమ్మం మున్సిపల్ కార్పొరేషన్కమిషనర్ అభిషేక్ అగస్త్య, కార్పొరేటర్లు, సంబంధిత అధికారులు, ప్రజా ప్రతినిధులు పాల్గొన్నారు.
