మహబూబ్ నగర్ అర్బన్, వెలుగు: యువతకు చదువే అసలైన ఆయుధమని ఎమ్మెల్యే యెన్నం శ్రీనివాస్ రెడ్డి తెలిపారు. పయనీర్ కార్యక్రమంలో భాగంగా ‘మహబూబ్‌‌‌‌నగర్ ఫస్ట్’ ఆధ్వర్యంలో శుక్రవారం ప్రభుత్వ బాలుర జూనియర్ కాలేజీ విద్యార్థులకు ఎప్సెట్, నీట్ ఎంట్రెన్స్ స్టడీ మెటీరియల్ ను ఎమ్మెల్యే తమ సొంత నిధులతో అందజేశారు.
ఈ సందర్భంగా ఎమ్మెల్యే మాట్లాడుతూ విద్యార్థి దశలో కష్టపడి చదివితే భవిష్యత్తులో ఎలాంటి ఆందోళన ఉండదన్నారు. యువత సమయాన్ని వృథా చేయకుండా కష్టపడి చదువుకోవాలని సూచించారు. చదువును నిర్లక్ష్యం చేస్తే జీవితాంతం కష్టాలు ఎదుర్కోవాల్సి వస్తుందని హెచ్చరించారు.
గతంలో కంటే ఈసారి ఉత్తమ ర్యాంకులు సాధించి మహబూబ్‌‌‌‌నగర్ ప్రతిష్టను పెంచాలని సూచించారు. విద్యా నిధికి నగరానికి చెందిన ప్రముఖ వ్యాపారవేత్త కౌకుంట్ల చంద్రమౌళి రూ.2 లక్షలు ఇవ్వగా, ఆయన కుటుంబ సభ్యులు కౌకుంట్ల అంజమ్మ, వెంకటరమణ, వందన రూ.లక్ష చొప్పున రూ.5 లక్షల చెక్కులను ఎమ్మెల్యేకు అందజేశారు.
యెన్నం హెల్త్ కిట్ అందజేత..
మహబూబ్‌‌‌‌నగర్ జిల్లా ఆసుపత్రిలో శిశువుల తల్లులకు ఎమ్మెల్యే యెన్నం శ్రీనివాస్ రెడ్డి హెల్త్ కిట్లను పంపిణీ చేశారు. ఈ సందర్భంగా ఎమ్మెల్యే మాట్లాడుతూ పేద, మధ్య తరగతి తల్లుల ప్రాథమిక అవసరాలు తీర్చేందుకు హెల్త్ కిట్లు ఉపయోగపడతాయని చెప్పారు. నియోజకవర్గంలోని ప్రతి నవజాత శిశువుకు ఈ కిట్లు అందేలా చూస్తామని తెలిపారు. ఆసుపత్రి సూపరింటెండెంట్ రంగ అజ్మీరా, హాస్పిటల్ డెవలప్మెంట్ కమిటీ సభ్యులు బెజ్జుగం రాఘవేందర్, ఆర్ఎంవో దుర్గ, ఏవో ప్రేరణ , డీసీసీ జనరల్ సెక్రటరీ సిరాజ్ ఖాద్రీ పాల్గొన్నారు.
