- అర్బన్లో మున్నూరు కాపు ఓట్ల చీల్చేందుకు పన్నాగం
- డీఎస్ కు రావాల్సిన ఎమ్మెల్సీ పదవిని లలిత డబ్బుతో కొనుక్కుంది
- ఎంపీ అర్వింద్
నిజామాబాద్, వెలుగు : అర్బన్ నియోజకవర్గంలో మున్నూరు కాపు ఓట్లను చీల్చి ఎన్నికల్లో లాభపడడానికి ఎమ్మెల్సీ కవిత పెద్ద కుట్రకు తెరలేపారని ఎంపీ అర్వింద్ ఆరోపించారు.టీపీసీసీ అధ్యక్షుడు రేవంత్రెడ్డితో మాట్లాడి, మాజీ ఎమ్మెల్యే ఆకుల లలితను కాంగ్రెస్లోకి పంపుతున్నారని అన్నారు. మున్నూరు కాపు సంఘానికి జీవిత కాల గౌరవాధ్యక్షుడైన డీఎస్ను మోసగించిన ఆకుల లలిత, ఇప్పుడు ఆయన కొడుకు సంజయ్ కు టికెట్ రాకుండా ప్రయత్నిస్తున్నారన్నారు. మంగళవారం అర్బన్ సెగ్మెంట్లో నిర్వహించిన బీజేపీ కార్యకర్తల మీటింగ్లో ఆయన మాట్లాడారు.
గతంలో డీఎస్కు వచ్చే ఎమ్మెల్సీ పదవిని దిగ్విజయ్సింగ్కు డబ్బులిచ్చి ఆకుల లలిత తెచ్చుకున్నారన్నారు. మున్నూరు కాపు ఓట్లను చీలనీయొద్దని, బీజేపీకి వేయాలన్నారు. కులమతాలకు అతీతమైన సమర్థుడిని అర్బన్లో బరిలో నిలుపుతామన్నారు. పార్టీ జిల్లా అధ్యక్షుడు బస్వా లక్ష్మీనర్సయ్య, పల్లెగంగారెడ్డి, స్రవంతిరెడ్డి, ధనపాల్ సూర్యనారాయణ, వెంకటరమణి తదితరులు ఉన్నారు.
ఎన్నికల ముగేసే దాకా ఇక్కడే..
అసెంబ్లీ ఎలక్షన్లు ముగిసే వరకు లోక్సభ నియోజకవర్గం దాటనని, బీజేపీ బూత్ కార్యకర్తలు కూడా బూత్దాటి ఎటూ వెళ్లొద్దని ఎంపీ అర్వింద్ కోరారు. బాల్కొండ మండలం మోర్తాడ్లో ఆయన కార్యకర్తల మీటింగ్లో మాట్లాడారు. మంత్రి ప్రశాంత్రెడ్డి ప్రాతినిధ్యం వహిస్తున్న నియోజకవర్గంలో అవినీతి, కమీషన్లు, గంజాయి సరఫరాకు అడ్డాగా మారిందన్నారు. ఓటు వేసే అవకాశం మరోసారి వచ్చిందని, బీజేపీని బలపరచాలన్నారు. పసుపు బోర్డు తీసుకొచ్చి మాట నిలబెట్టుకున్నానన్నారు. ఏలేటి మల్లికార్జున్రెడ్డి, నిమ్మల శ్రీనివాస్, మల్కన్నగారి మోహన్, పద్మ పాల్గొన్నారు.
