- ఈ అంశంపై సుప్రీం కోర్టు క్లారిటీ ఇచ్చి ఉంటే బాగుండు
- తీర్పును స్వాగతిస్తున్నం: ఎంపీ రఘునందన్ రావు
న్యూఢిల్లీ, వెలుగు: ఎమ్మెల్యేల ఫిరాయింపు కేసులో సుప్రీంకోర్టు తీర్పును స్వాగతిస్తున్నట్లు బీజేపీ ఎంపీ రఘునందన్ రావు తెలిపారు. అయితే అనర్హత పిటిషన్లపై మూడు నెలల్లో స్పీకర్ నిర్ణయం తీసుకోకపోతే ఆ తర్వాత ఏమిటి అనేది అర్థం కావడం లేదన్నారు. ఈ విషయంలో సీజేఐ ధర్మాసనం క్లారిటీ ఇచ్చి ఉంటే బాగుండు అని ఆయన అభిప్రాయపడ్డారు. ‘‘10 మంది ఫిరాయింపు ఎమ్మెల్యేల జడ్జిమెంట్లో స్పీకర్ కు నిర్ణీత సమయం పెట్టారు. ఒక వేళ స్పీకర్ నిర్ణయం తీసుకోకపోతే.. మళ్లీ కోర్టుకు వెళ్లాల్సిందే.
ఈ విషయంలో ధర్మాసనం స్పష్టత ఇస్తే బాగుండు’’ అని పేర్కొన్నారు. గురువారం కోర్టు తీర్పు అనంతరం రఘునందన్ రావు ఢిల్లీలోని తెలంగాణ భవన్ లో మీడియాతో మాట్లాడారు. ‘‘స్పీకర్ నిర్ణయం తీసుకోవాలని ఆశించడం... శాసించడం వేరు. ఈ సున్నితమైన విషయంలో తేడాతో... నేతలు పార్టీలు మారుతున్నారు. అయితే స్పీకర్ ప్రజల పక్షాన నిర్ణయం తీసుకుంటారని భావిస్తున్నాం. కాంగ్రెస్, బీఆర్ఎస్ ఒకే నాణానికి బొమ్మ బొరుసు లాంటివి” అని వ్యాఖ్యానించారు.
హిందువులను తీవ్రవాదులుగా కాంగ్రెస్ చిత్రీకరిస్తున్నది
2008 ఏడాదిలో యూపీఏ– 1 ప్రభుత్వం కొత్త చరిత్ర సృష్టించే ప్రయత్నం చేసిందని, ఎన్నికల్లో లబ్ధిపొందేందుకు గాను కాంగ్రెస్ నేతలు మాలేగావ్ కేసులో హిందువులను టెర్రరిస్టులుగా చిత్రీకరించే ప్రయత్నం చేశారని ఎంపీ రఘునందన్రావు ఆరోపించారు. ఇందులో భాగంగానే నిర్దోషుల్ని దోషులుగా ప్రచారం చేశారని ఆయన అన్నారు. అప్పటి మాలేగావ్, ఇప్పటి పహల్గాం అయినా కాంగ్రెస్ వైఖరి ఒక్కటే అని ఆయన మండిపడ్డారు.
