ముంబై సముద్ర తీరంలో క్రూజ్ షిప్లో జరిగిన రేవ్ పార్టీపై నార్కొటిక్ కంట్రోల్ బ్యూరో (ఎన్సీబీ) దాడులు చేసింది. పార్టీలో డ్రగ్స్ వాడుతున్నారన్న అనుమానంతో తనిఖీలు నిర్వహించింది. ఈ దాడుల్లో బాలీవుడ్ బాద్‌షా షారూఖ్ ఖాన్ కొడుకు అర్యాన్ ఖాన్, ముగ్గురు మహిళలు సహా మొత్తం 13 మందిని ఎన్సీబీ అధికారులు కస్టడీలోకి తీసుకున్నారు. పార్టీలో నిషేధిత కొకైన్, హషీష్, ఎండీ లాంటి డ్రగ్స్‌‌ను స్వాధీనం చేసుకున్నట్లు సమాచారం.
ఈ దాడుల్లో అరెస్టులకు సంబంధించి ఎన్సీపీ జోనల్ డైరెక్టర్ సమీర్ వాంఖడే స్పందించారు. షారూఖ్ కుమారుడు అర్యాన్ ఖాన్‌తో సహా అరెస్టు చేసిన మరో 8 మంది వివరాలను ఆయన ప్రకటించారు. ‘అక్రమ రేవ్ పార్టీకి సంబంధించి 8 మందిని అరెస్ట్ చేశాం. అర్యాన్ ఖాన్, అర్బాజ్ మర్చంట్, మున్మున్ ధమేచా, నుపుర్ సారికా, ఇస్మీత్ సింగ్, మోహక్ జస్వాల్, విక్రాంత్ ఛోకర్, గోమిత్ చోప్రా, గోమిత్ చోప్రాను అదుపులోకి తీసుకున్నాం. ప్రస్తుతం వీరిని ప్రశ్నిస్తున్నాం’ అని సమీర్ వాంఖడే పేర్కొన్నారు.
