స్టార్ హీరో, హీరోయిన్లు లేరు, భారీ సెట్స్ కూడా లేవు. కమర్షియల్ ఫార్మాట్ సినిమాలు అంతకన్నా కాదు. అయితేనేం, చిన్న సినిమాలే పెద్దగా కనిపించాయి. దానికి ఒక కారణం శేఖర్ చంద్ర మ్యూజిక్. గడిచిన పదేళ్లలో ఎన్నో చిన్న సినిమాలకి బ్లాక్ బస్టర్ ట్యూన్స్ కట్టాడు ఈ మ్యుజీషియన్. ‘నచ్చావులే’తో మొదలుపెట్టి ‘మనసారా’, ‘కార్తికేయ’, ‘సినిమా చూపిస్త మావ’ లాంటి మరెన్నో హిట్ ఆల్బమ్స్ ఇచ్చాడు. రీసెంట్గా ‘సవారి’తో ఆడియెన్స్ని ట్యూన్ చేసిన శేఖర్ చంద్ర ఇండస్ట్రీకి వచ్చి పదహారేండ్లు అయింది. కానీ, ఎన్ని హిట్ పాటలకి బాణీలు కట్టినా పెద్ద సినిమాల్లో అవకాశాలు రాలేదు ఇతనికి. ‘‘ఎందుకు’’? అని అడిగితే ‘ఇప్పటిదాకా నా దగ్గరికి వచ్చిన సినిమాలే చేశా’ను అన్నాడు.
సక్సెస్కి షార్ట్కట్ హార్డ్వర్క్ ఒక్కటే..ఇదే నమ్మాడు శేఖర్చంద్ర కూడా. అందుకే తనని తాను నిరూపించుకునే ప్రతి చిన్న అవకాశాన్ని పట్టుకున్నాడు. ఆ ప్రయత్నమే తనని 30 సినిమాల వరకు నడిపించింది. చిన్న సినిమాలకి పెద్ద మ్యూజిక్ డైరెక్టర్ని చేసింది. తనలాంటి వాళ్లెందరికో ఇన్స్పిరేషన్గా నిలబెట్టింది. ఇండస్ట్రీకి ఎన్నో ఆల్ టైం హిట్ సాంగ్స్ ఇచ్చిన శేఖర్ ప్రస్తుతం చేతినిండా సినిమాలతో బిజీబిజీగా ఉన్నాడు. ఆ విశేషాలు అడిగితే ‘‘ఫ్యూచర్లో అన్ని రకాల పాటలు కంపోజ్ చేయాలనుకుంటున్నా.. మంచి సినిమాలకి ట్యూన్స్ కట్టాలనుకుంటున్నా..’’ అంటూ ఇలా చెప్పుకొచ్చాడు.
‘‘మా నాన్న హరి అనుమోలు సినిమాటోగ్రాఫర్. ‘నువ్వే నువ్వే’, ‘నువ్వే కావాలి’, ‘గమ్యం’, ‘స్టూడెంట్ నెంబర్ వన్’ లాంటి ఎన్నో హిట్ సినిమాలకి పనిచేశారాయన. దానివల్ల చిన్నప్పట్నించీ ఇండస్ట్రీపై ఒక అవగాహన ఉంది. కానీ, మ్యూజిక్ గురించి ఆవగింజంతైనా తెలియదు నాకు. కాలేజీలో చేరే వరకు తెలుసుకునే ప్రయత్నం కూడా చేయలేదు.. ఎందుకలా అంటే? మొదట్నించీ మ్యూజిక్ ఆలోచనలు లేవు నా మైండ్లో. అసలు ఏ గోల్ లేకుండా తిరుగుతుండేవాడ్ని. స్కూల్ అంటే జైలు ఫీలింగ్ వచ్చేది నాకు. మ్యాథ్స్, సైన్స్ అంటే తలనొప్పి మొదలయ్యేది. దాంతో అత్తెసరు మార్క్స్ కోసం పడరాని పాట్లు పడేవాడ్ని. అవి చూసి ఇంట్లో వాళ్ల తిట్లు. వాటన్నింటి మధ్య కష్టపడి ఇంటర్ వరకు చేరుకున్నా. ఆ టైంలో ఏఆర్ రెహ్మాన్, ఇళయరాజా పాటలు చాలా ఇన్స్పైర్ చేశాయి. మైఖేల్ జాక్సన్ ఆల్బమ్స్ మ్యూజిక్పై మరింత ఆసక్తి పెంచాయి. దాంతో ఒక హాబీలా గిటార్ క్లాస్లో చేరా. అక్కడ నా సాంగ్ కంపోజిషన్స్ విని అంతా మెచ్చుకునేవాళ్లు. అవన్నీ చూసి మ్యూజిక్ వైపు మరిన్ని అడుగులు వేయాలనుకున్నా. పియానోలో గ్రేడ్స్ చేశా. కానీ, సినిమాల్లోకి వెళ్తానంటే ఇంట్లోవాళ్లు అంత తేలిగ్గా ఒప్పుకోలేదు!
నాన్న షాక్ అయ్యారు
డిగ్రీ డిస్ కంటిన్యూ చేశా. మ్యూజిక్ వైపు వెళ్లాలనుకుంటున్నట్టు ఇంట్లో చెప్పా. ఆ మాట వినగానే నాన్న షాక్. ఆయనకి ఇండస్ట్రీ స్ట్రగుల్స్ తెలుసు కాబట్టి.. మరో ఆలోచన లేకుండా వద్దన్నారు. యానిమేషన్, సినిమాటోగ్రఫీ అంటే కాస్తోకూస్తో కన్విన్స్ అయ్యేవాళ్లేమో.. కానీ, నేను అవేవీ కాకుండా మ్యూజిక్ అనడంతో టెన్షన్ పడ్డారు. వద్దని నచ్చజెప్పే ప్రయత్నం చేశారు. కానీ, నేను కాస్త మొండిగా మ్యూజిక్లో నన్ను నేను నిరూపించుకోవాలనుకున్నా. ఆ ప్రయత్నంలో కొన్ని అవమానాలు ఎదురయ్యాయి. నాతో కొందరు ఫ్రీగా వర్క్ చేయించుకున్నారు కూడా. అవన్నీ దాటి మ్యూజిక్ డైరెక్టర్ కోటి దగ్గర కీబోర్డు ప్లేయర్గా చేరా. ఆ టైంలో కోటీని కలవడానికి వచ్చిన ఉప్పలపాటి నారాయణరావు నన్ను గమనించారు. ‘కీబోర్డు ఒక్కటేనా.. ట్యూన్స్ ఏవైనా రెడీ చేసుకున్నావా’ అని అడిగారు. ఆ మాట రావడమే ఆలస్యం నా కంపోజిషన్స్ అన్నీ వినిపించా.. ఆయనకి అవి బాగా నచ్చడంతో ‘‘కుదిరితే అవకాశం ఇస్తాన’’ని చెప్పి వెళ్లిపోయారు. ఆ తర్వాత కొన్నిరోజులకే ఆయన ఆఫీసు నుంచి ఫోన్ వచ్చింది.
నన్ను నేను నమ్మలేదు
ఎక్స్పీరియెన్స్ లేకపోవడంతో ‘‘అసలు చేయగలనా? లేదా ?’’ అని చాలా టెన్షన్ పడ్డా. నా పరిస్థితే అలా ఉంటే ఇక ఆ సినిమా డైరెక్టర్, ప్రొడ్యూసర్ బాధేం చెప్పను. ఇరవై రెండేండ్ల నన్ను నమ్మి సినిమా చేతిలో పెట్టే సాహసం చేయలేకపోయారు వాళ్లు. టెస్ట్ చేద్దామని ఒక హెవీ బ్రేకప్ సాంగ్ ఇచ్చారు. క్షణాల్లో ట్యూన్స్ కట్టి వినిపించా. వెంటనే ‘‘జ్ఞాపకం” సినిమాకి మ్యూజిక్ డైరెక్టర్గా ఫైనల్ చేశారు. కానీ, ఆ సినిమా పెద్దగా ఆడకపోవడం నాకు మైనస్ అయింది. ఆ బాధలో ఉన్నప్పుడే డైరెక్టర్ రవిబాబు నుంచి పిలుపు వచ్చింది. ‘జ్ఞాపకం’ సినిమా పాటలు నచ్చి ‘అనసూయ’ సినిమాకి అవకాశం ఇచ్చారాయన. ఆ సినిమా చేస్తున్నప్పుడే ఆయన డైరెక్షన్లో ‘నచ్చావులే’ కి సైన్ చేశా. అది రిలీజ్ అయ్యాక వెనక్కి తిరిగి చూసుకోవాల్సిన పరిస్థితి రాలేదు. ఆ సినిమాలోని ప్రతి పాట సూపర్ హిట్ కావడంతో వరుసగా అవకాశాలు వచ్చాయి.
తెలుగు సింగర్స్కీ అవకాశాలు
యూట్యూబ్, మ్యూజిక్ యాప్స్ ద్వారా వరల్డ్ మ్యూజిక్ అందరికీ దగ్గరవుతోంది. లాంగ్వేజ్ బౌండరీలు లేకుండా అందరూ అన్ని భాషల పాటలూ వింటున్నారు . దాంతో మ్యుజీషియన్లు కూడా కొత్తగా చేయాలి.. కొత్త సౌండింగ్ ఇవ్వాలని ట్రై చేస్తున్నారు. అయితే సౌండింగ్ , బీట్, ఇనుస్ట్రుమెంట్స్ ఎంత మారినా పాటలోని ఎమోషన్ మాత్రం ఎప్పటికీ మారదు. మన దగ్గర పాడుతున్న ఇతర భాషల సింగర్స్ విషయానికొస్తే.. వాళ్ల వాయిస్లు చాలా పెక్యులియర్గా ఉంటాయి. వాళ్లు తెలుగు పదాలు పలికే విధానం కూడా డిఫరెంట్గా ఉంటుంది. అందుకే వాళ్ల గొంతుకి సెట్ అవుతాయి అనిపించే పాటల్ని వాళ్లతోనే పాడిస్తుంటారు మ్యూజిక్ డైరెక్టర్లు. అలాగని తెలుగు వాళ్లకి అవకాశాలు లేవని కాదు. నేనైతే నా సినిమాల్లో మన వాళ్లకే ఎక్కువ ప్రిఫరెన్స్ ఇస్తుంటా.
అదే నా ప్రయారిటీ
ఈ మధ్య సోనీలో రిలీజ్ అయిన ‘హ్యాష్ట్యాగ్ బ్రో’ సినిమాకి మ్యూజిక్ ఇచ్చా. అలాగే ప్రస్తుతం ‘అతిథి దేవోభవ’, ‘రైటర్ పద్మభూషణ్’, ‘సమ్మతమే’తో పాటు మరో నాలుగు సినిమాలకి ట్యూన్స్ కడుతున్నా. నా మ్యూజిక్ పదిమందికీ నచ్చితే అంతకు మించిన తృప్తి ఇంకేం ఉండదు నాకు. అలాగే ఇప్పటివరకు నన్ను వెతుక్కుంటూ వచ్చిన సినిమాలు మాత్రమే చేసుకుంటూ వెళ్లా. కానీ, ఇకనుంచి నేను కూడా కొన్ని సినిమాల్ని వెతుక్కొంటూ వెళ్లాలనుకుంటున్నా. ప్రస్తుతం ఆ ప్రయత్నంలోనే ఉన్నా . పర్సనల్ లైఫ్ విషయానికొస్తే నాన్న సినిమాటోగ్రాఫర్గా అందరికీ పరిచయమే. మొదట్లో మ్యూజిక్ వద్దని వాదించిన నాన్నే ఇప్పుడు నాకు మ్యూజిక్ విషయంలో సలహాలు ఇస్తుంటారు. అమ్మ భాను హౌస్ వైవ్. తనే నా మ్యూజిక్ కెరీర్కి బిగ్గెస్ట్ సపోర్ట్. సిచ్యుయేషన్ ఏదైనా సరే నేనున్నానే ధైర్యం ఇస్తుంటుంది అమ్మ. లవ్ కమ్ అరేంజ్డ్ మ్యారేజ్ నాది. నా బెటరాఫ్ మాధురికి నా మ్యూజిక్లో వచ్చిన ‘ కార్తికేయ’ సినిమాలోని ‘ సరిపోవు .. ’ పాటలంటే తనకి చాలా ఇష్టం.
ప్రతి పాట కష్టమే
సిచ్యుయేషన్ చెప్పగానే ట్యూన్ వచ్చిన సందర్భాలు నా కెరీర్లో చాలా తక్కువ. ఏ ట్యూన్ అయినా త్వరగా శాటిస్ఫాక్షన్ ఇవ్వదు నాకు. క్యాచీ ట్యూన్స్ కోసం చాలా ట్రై చేస్తుంటా. డైరెక్టర్ పాట చెప్పగానే హీరోహీరోయిన్లు గ్రీనరీలో ఉన్నట్టు.. బీచ్లో నడిచొస్తున్నట్టు ఊహించుకుంటా. అంతలా ఫీలై ట్యూన్ కడతాను కాబట్టే ఒక్కో పాటకి ఐదో రోజులు పడుతుంది. పదిహేను రోజులు టైం తీసుకున్న పాటలు కూడా ఉన్నాయి. బ్యాక్ గ్రౌండ్ స్కోర్ విషయంలోనూ స్పెషల్ కేర్ తీసుకుంటా.
మ్యూజిక్ చేసిన సినిమాల్లో కొన్ని
నచ్చావులే, మేం వయసుకు వచ్చాం, కార్తికేయ, ఎక్కడికిపోతావు చిన్నవాడా, సినిమా చూపిస్త మావ, సుబ్రహ్మణ్య పురం, నువ్విలా, సవారి, 118, అందగాడు, నాన్న నేను నా బాయ్ఫ్రెండ్స్, బ్రదర్ ఆఫ్ బొమ్మాళి, పెళ్లి పుస్తకం, మనసారా.
అదొక ఛాలెంజ్
ఇప్పటివరకు 30 సినిమాలకి మ్యూజిక్ ఇచ్చా. వాటిల్లో కల్యాణ్ రామ్ ‘118’ తప్పించి మిగతావన్నీ లిమిటెడ్ బడ్జెట్లో తీసినవే. అప్కమింగ్ యాక్టర్స్వే. వాళ్లు మ్యూజిక్ డైరెక్టర్పై ఎక్కువగా డిపెండ్ అవుతారు. పాటలు హిట్ అయితే సినిమాకి హైప్ వస్తుందనుకుంటారు. దాంతో మ్యూజిక్ విషయంలో ఎక్కువగా వర్కవుట్ చేస్తుంటా. నా కష్టానికి తగ్గట్టే దాదాపుగా నేను మ్యూజిక్ ఇచ్చిన పాటలన్నీ హిట్ అయ్యాయి. కానీ, చిన్న సినిమాలకి రీచ్ తక్కువగా ఉండటంతో ..పెద్ద బ్యానర్లలో అవకాశాలు రాలేదు. పాటలు హిట్ అయితే పిలిచి అవకాశం ఇస్తారన్న ఆలోచనలోనే ఉన్నా నేనెప్పుడూ. కానీ, అది తప్పని కొన్నాళ్లకి అర్థమైంది. ఆడియో ఫంక్షన్లలో కొంతమంది డైరెక్టర్స్ని కలిస్తే. ‘‘ఫలానా సాంగ్ చేసింది నువ్వేనా’’ అని అడుగుతుంటారు. ఆ విషయంలో నాది తప్పులేకపోలేదు. కెరీర్ స్టార్టింగ్ నుంచి నన్ను నేను కాస్త ప్రమోట్ చేసుకొని ఉంటే బాగుండేది.
::: ఆవుల యమున