వయసు శరీరానికి మాత్రమే.. మనసుకి కాదు. ఏదైనా సాధించాలన్న పట్టుదలకి అంతకన్నా కాదు. అందుకు ఉదాహరణే 88 ఏండ్ల ఈ బామ్మ. పేరు నాగమణి. అరవై ఏండ్ల వయసులో ‘రూట్స్ అండ్ షూట్స్’ పేరుతో బిజినెస్ స్టార్ట్ చేసింది ఈ బామ్మ. నూట యాభై ఏండ్ల కిందటి హెయిర్ ఆయిల్ను మార్కెట్లోకి తీసుకొచ్చింది. మంచి లాభాలతో.. సక్సెస్ఫుల్ ఎంట్రప్రెనూర్గా రాణిస్తున్న ఈ బామ్మ గురించి..
అందరూ ప్రేమగా ‘మణి ఆంటీ’ అని పిలుచుకునే ఈ బామ్మ కర్నాటకలో పుట్టింది. పొడవాటి జుట్టును ఇష్టపడే ఈమెకి..24 ఏండ్ల వయసులోనే జుట్టు రాలిపోవడం మొదలైంది. ఎన్ని వంటింటి చిట్కాలు ఫాలో అయినా.. జుట్టు ఊడటం ఆగలేదు. దాంతో మైసూర్లో ఉండే తన ఫ్రెండ్కి ఫోన్ చేసింది. నాగమణి సమస్య విన్న ఆమె.. వాళ్ల అమ్మమ్మల నుంచి నేర్చుకున్న సీక్రెట్ హెయిర్ ఆయిల్తయారీ చెప్పింది. అది వాడాక జుట్టు హెయిర్ ఫాల్ సమస్య ఆమె దరిదాపుల్లోకి కూడా రాలేదు. దాంతో ఆ హెయిర్ ఆయిల్ని తెలిసినవాళ్లకు, బంధువులకు కూడా తయారు చేసి ఇచ్చింది. అందరూ ఫుల్ హ్యాపీ.. మార్కెట్లోకి తీసుకురమ్మని సలహాలు కూడా ఇచ్చేవాళ్లు.
క్యాన్సర్ నుంచి కోలుకొని..
హెయిర్ ఆయిల్ బిజినెస్లోకి రావాలని ఉన్నా... భర్త , ఇద్దరు పిల్లల బాధ్యత, ఇంటి పనులే తన మొదటి ప్రయారిటీ అనుకుందామె. కానీ, తనకి అరవై ఏండ్లు వచ్చేసరికి.. భర్త తోడు దూరమైంది. పిల్లలు ఉద్యోగాలతో బిజీ అయ్యారు. దాంతో ఒంటరితనం నుంచి బయటపడటానికి తనకిష్టమైన హెయిర్ ఆయిల్ తయారీ రంగంలోకి రావాలనుకుంది. అనుకున్నట్టుగానే ‘రూట్స్ అండ్ షూట్స్’ పేరుతో మార్కెట్లోకి తీసుకొచ్చింది. అలా సాగిపోతున్న టైంలో క్యాన్సర్ ఆమె శరీరాన్ని కుంగదీసింది. దాన్నుంచి కాస్త బయటపడగానే పెద్ద కూతురు ఇక లేదన్న వార్త ఆమెని కోలుకోలేని దెబ్బ తీసింది. ఆ పరిస్థితులన్నింటి నుంచి బయటకు రావడానికి.. బిజినెస్పైనే పూర్తిగా దృష్టి పెట్టింది. చిన్న కూతురు కూడా తనకి చెయ్యి అందించడంతో అప్పటివరకు కాలక్షేపంగా చేసిన బిజినెస్ని సీరియస్గా తీసుకుంది. ఎలాంటి ప్రమోషన్స్ లేకుండా కేవలం నోటి మాట ద్వారానే ఈ బామ్మ హెయిర్ ఆయిల్ ఫేమస్ అయింది. తెలిసినవాళ్ల ద్వారా ఇతర దేశాల్లోనూ పాపులర్ అయింది.
చేతితో పొడి చేసి..
కొబ్బరి నూనెతో పాటు మరో నాలుగు నూనె గింజలతో ఈ హెయిర్ ఆయిల్ తయారుచేస్తోంది బామ్మ. ఈ ఆయిల్కి అవసరమయ్యే రెండు రకాల గింజలని హిమాలయాల నుంచి తెప్పిస్తుంది. వాటన్నింటినీ చేతితో పొడి చేసి కొబ్బరి నూనెలో కలుపుతుంది. ఆరు వారాలు ఆ నూనెని ఎండ తగిలే చోట ఉంచి.. డబ్బాల్లో నిల్వ చేస్తుంది. అన్ని కాలాల్లో నూనె తయారీకి సరిపడా ఎండ ఉండదు కాబట్టి.. సంవత్సరానికి సరిపడా స్టాక్ని ఒకేసారి తయారుచేస్తుంది. మూడొందల ఎమ్ఎల్ నూనె బాటిల్ని ఆరొందల రూపాయలకి అమ్ముతుంది.
“ఈ ఆయిల్ 150 ఏండ్ల కిందటిది. దీని తయారీలో వాడే పదార్థాలన్నీ ఆర్గానిక్వే. పైగా ఎలాంటి మెషిన్స్ సాయం తీసుకోకుండా.. ఈ నూనె తయారుచేస్తాం. దీన్ని పెద్ద మొత్తంలో మార్కెట్లోకి తీసుకొచ్చే ఆలోచన ఉంది. కానీ, దానికి సరైన పార్ట్నర్స్, టీం కావాలి. రానున్న జనరేషన్స్కి ఈ ఆయిల్ పరిచయం చేయాలన్నదే నా లక్ష్యం’’ అని చెప్తోంది.