- సిటీలో 40 శాతమే ఈ - కేవైసీ పూర్తి
- ఫిబ్రవరి ఆఖరు వరకు గడువు పొడిగింపు
- సిటీలో దాదాపు లక్ష వరకు బోగస్ కార్డులు
- ఏరివేత తర్వాత అర్హుల గుర్తింపు ఈజీ
- మార్చి నుంచి కొత్త కార్డులు జారీ
హైదరాబాద్, వెలుగు : గ్రేటర్ హైదరాబాద్లో కొత్త రేషన్ కార్డుల పంపిణీకి పౌరసరఫరాలశాఖ అధికారులు సన్నాహాలు చేస్తున్నారు. అయితే.. ప్రస్తుత రేషన్కార్డుల్లో ముందుగా అనర్హులను గుర్తించి తొలగించాలని అధికారులు నిర్ణయించారు. ఆ తర్వాతనే కొత్త కార్డులను జారీ చేయాలని కూడా భావిస్తున్నారు. ఇందుకు ప్రక్రియను వేగవంతం చేసినట్టుగా సివిల్ సప్లయ్ కు చెందిన ఓ ఉన్నతాధికారి తెలిపారు. రేషన్కార్డు ఈ– కేవైసీ చేయించుకోవాలని అధికారులు చెబుతున్నారు.
ఈనెల 31 వరకే గడువు విధించగా.. వందశాతం పూర్తి కాకపోగా మరో నెల రోజుల పాటు పొడిగించినట్టు ప్రకటించారు. ఫిబ్రవరి ఆఖరునాటికి ఈ కేవైసీ ప్రక్రియ పూర్తి చేయాలని సర్కిళ్ల అధికారులకు ఆదేశాలు జారీ చేశారు. ప్రతి కార్డుదారుడు ఈ కేవైసీ చేయించుకునేలా చూడాలని డీలర్లకు సూచించారు.
40శాతం లోపే పూర్తి
సిటీలో రేషన్కార్డుల ఈ– కేవైసీ పూర్తి చేసుకోవాలని అధికారులు ప్రచారం చేస్తున్నా కార్డుదారులు మాత్రం ఆసక్తి చూపకపోతుండగా ప్రక్రియ నెమ్మదిగా సాగుతోంది. ప్రస్తుతం 35 నుంచి 40శాతం మేరకే పూర్తయినట్టు అధికారులు చెబుతున్నారు. కోర్సిటీలోని 9 సర్కిళ్లలో దాదాపు 6 లక్షల రేషన్కార్డులు, శివారు ప్రాంతాల్లో మరో రెండు లక్షల కార్డులు ఉన్నట్టు పేర్కొంటున్నారు. గ్రేటర్లో 1,600 రేషన్షాపులు ఉండగా, వీటి పరిధిలో దాదాపు లక్ష వరకు బోగస్ రేషన్కార్డులు ఉన్నట్టు అంచనా వేస్తున్నారు. భారీగా బోగస్కార్డులను ఫిల్టర్చేయడం ద్వారా మరింత మంది అర్హులకు కేటాయించడానికి అవకాశం ఉంటుందని అధికారులు చెబుతున్నారు.
మార్చి నుంచి జారీ!
వచ్చే నెల రోజుల్లో బోగస్ కార్డులను గుర్తించి వాటిని రద్దు చేయాలని అధికారులు భావిస్తున్నారు. అందుకే ప్రతి కార్డుదారుడు రేషన్షాపులకు వెళ్లి ఈ– కేవైసీ చేయించుకోవాలని సూచిస్తున్నారు. కార్డు ఎవరి పేరున ఉందో వారితో పాటు, కార్డులో పేర్లున్న వారు కూడా రేషన్షాపులో వేలి ముద్రలను వేయాల్సి ఉంది. ఈ ప్రక్రియతో అర్హులైన వారు మాత్రమే తెరపైకి వచ్చే అవకాశం ఉంటుంది. ఒక వేళ కార్డులో పేర్లున్న వారు రేషన్షాపులకు వెళ్లి ఈ– కేవైసీ చేయించకపోతే బోగస్ కార్డుగానే పరిగణించాల్సి వస్తుందని అధికారులు స్పష్టం చేస్తున్నారు.
ప్రక్రియ పూర్తయితే చాలా బోగస్కార్డులు తొలగిపోతాయంటున్నారు. అనంతరం కొత్త రేషన్ కార్డులకు దరఖాస్తు చేసుకున్న వారి వెరిఫికేషన్పూర్తిచేసిన తర్వాతనే మంజూరు చేస్తామంటున్నారు. పాత కార్డుల్లో దాదాపు లక్ష నుంచి లక్షన్నర రద్దయ్యే అవకాశం ఉంటుందని అంచనా వేస్తున్నారు. మార్చి నుంచి అర్హులకు కొత్త రేషన్కార్డులను పంపిణీ చేస్తామని ఉన్నతాధికారి ఒకరు వెల్లడించారు.
