నిర్మల్, వెలుగు: అదిలాబాద్–నిర్మల్–ఆర్మూర్ మధ్య కొత్త రైల్వే ప్రాజెక్టును మంజూరు చేయాలని నిర్మల్ ఎమ్మెల్యే ఏలేటి మహేశ్వర్ రెడ్డి కేంద్ర రైల్వే శాఖ మంత్రి అశ్విని వైష్ణవ్కు విజ్ఞప్తి చేశారు. న్యూఢిల్లీలో బీజేపీ ఎమ్మెల్యేలు, ఎంపీల బృందంతో కలిసి మహేశ్వర్ రెడ్డి రైల్వే మంత్రిని కలిసి విషయాన్ని ఆయన దృష్టికి తీసుకెళ్లారు.
ఈ ప్రాంత ప్రజలు రైల్వే సౌకర్యం లేక ఇబ్బందులు ఎదుర్కొంటున్నారని, ఈ రైల్వే లైన్ నిర్మిస్తే ఉత్తర తెలంగాణలోని వ్యాపారులకు, విద్యార్థులకు, రైతులు, ప్రజలకు ఎంతో ప్రయోజనం చేకూరుతుందని వివరించారు. రైల్వే లైన్ నిర్మాణానికి వెంటనే చర్యలు తీసుకోవా లని కోరారు.
