లండన్ : ఒకటి కాదు.. రెండు కాదు.. ఆ రియల్ ఎస్టేట్ వెంచర్లో 263 ఇండ్లు కట్టారు, అమ్మారు.. కొన్న వాళ్లంతా ఇండ్లలో దిగిపోయారు. రెండేళ్లు గడిచిపోయాయి. సీన్ కట్చేస్తే.. ఆ ఇండ్ల నిర్మాణానికి అవసరమైన అనుమతులు తీసుకోలేదని స్థానిక మున్సిపాలిటీ ప్రకటించింది. దీంతో అక్కడ తలా రూ.2 కోట్లు పెట్టి ఇండ్లు కొన్న వాళ్లంతా లబోదిబోమంటున్నరు. కష్టార్జితంతో కొన్న తమ ఇండ్లను.. అక్రమ నిర్మాణాల కింద జమకట్టి కూలుస్తరేమోనని భయపడుతున్నరు. ఇంగ్లండ్లోని చెషైర్ కౌంటీ పరిధిలో క్రూ పట్టణ శివారులో ఉన్న ‘కంట్రీ సైడ్పార్ట్నర్ షిప్స్’ రియల్ఎస్టేట్ వెంచర్లో ఇండ్లు కొన్న వాళ్ల దీనస్థితి ఇది.
ట్రైన్ ఫ్యాక్టరీ స్థలంలో వెంచర్
గతంలో కంట్రీసైడ్ పార్ట్నర్షిప్స్ వెంచర్ స్థానంలో బాంబార్డియర్ ట్రైన్ ఫ్యాక్టరీ ఉండేది. అనంతరం కాలంలో దాన్ని మూసివేశారు. ఆ 17 ఎకరాల స్థలాన్ని ‘కంట్రీసైడ్ పార్ట్నర్షిప్స్’ అనే రియల్ ఎస్టేట్ కంపెనీ కొనుగోలు చేసింది. 2018 డిసెంబరులో ఈ స్థలంలో ఇండ్ల నిర్మాణానికి మున్సిపాలిటీ(చెషైర్ఈస్ట్ కౌన్సిల్) నుంచి పర్మిషన్స్ కూడా వచ్చాయి. దీంతో మూడు నుంచి నాలుగు బెడ్ రూమ్స్ కలిగిన 239 ఇండ్లను, 24 ఫ్లాట్లను కంపెనీ కట్టింది. వెంచర్ పరిధిలో ఇంకొన్ని రోడ్ల నిర్మాణ పనులు పెండింగ్లోనే ఉన్నాయి.
మున్సిపల్ అధికారుల నోటీసులు
‘కంట్రీ సైడ్పార్ట్నర్షిప్స్’ కంపెనీకి మున్సిపల్ అధికారులు నోటీసులు జారీ చేశారు. ఇండ్లు కట్టడానికి ముందు, కట్టేటప్పుడు నేలలోని కాలుష్య కారకాలకు సంబంధించిన పరీక్షలు చేయకపోవడంపై అభ్యంతరం వ్యక్తంచేశారు. గతంలో అక్కడ ఉన్న ట్రైన్ ఫ్యాక్టరీ వల్ల భూమిలో ఇంకిపోయిన ప్రమాదకర రసాయనాలు, కాలుష్య కారకాల వల్ల ప్రజల ఆరోగ్యాలకు ముప్పు ఉండదనే నిర్ధారణకు ఎందుకు రాలేదని ప్రశ్నించారు. స్థానిక కౌన్సిలర్లు కూడా ‘కంట్రీ సైడ్పార్ట్నర్షిప్స్’ కంపెనీపై విరుచుకుపడుతున్నారు. ఆ కంపెనీ ప్రజలకు జవాబుదారీగా ఉండటానికంటే లాభాలకే ప్రాముఖ్యతనిచ్చిందని ఆరోపిస్తున్నారు.
ఇండ్లు కొనుక్కున్నోళ్ల ఆందోళన
మున్సిపల్ అధికారులు, స్థానిక కౌన్సిలర్లు, రియల్ ఎస్టేట్ కంపెనీ నడుమ ఇండ్లు కొన్న 263 కుటుంబాలు నలిగిపోతున్నాయి. మున్సిపల్ధ్రువీకరణ లేకపోవడంతో.. తమ ఇండ్లను అమ్ముకునే, లీజుకు ఇచ్చుకునే పరిస్థితి లేకుండాపోయిందని ఆవేదన వ్యక్తం చేస్తున్నారు. ఇండ్ల ధర కూడా బాగా పడిపోయిందని అంటున్నారు. రాజకీయ దురుద్దేశంతో, లంచాన్ని ఆశించి ‘కంట్రీ సైడ్పార్ట్నర్షిప్స్’ కంపెనీని వేధిస్తున్నారని ఇంకొందరు అభిప్రాయపడుతున్నారు.