- తడి చెత్తను ప్రాసెస్ చేసి ఎలక్ట్రిసిటీ జనరేషన్ కు ప్లాన్
- గ్రేటర్ వరంగల్ కార్పొరేషన్లో ఆఫీసర్ల నిర్వాకం
- గతంలో బాలసముద్రంలో బయో గ్యాస్-విద్యుదుత్పత్తి యూనిట్ ఏర్పాటు
- ఆఫీసర్ల నిర్లక్ష్యంతో మూలకుపడిన ప్లాంట్
- మడికొండలో కొత్త ప్లాంట్ ఏర్పాటుకు కసరత్తు
హనుమకొండ, వెలుగు: నగరంలో వెలువడుతున్న చెత్తలో కొంత భాగాన్ని ట్రీట్మెంట్ చేసేందుకు గతంలోనే స్వచ్ఛ భారత్ మిషన్ లో భాగంగా బాలసముద్రంలో బయో మిథనేషన్ కం పవర్ జనరేషన్ ప్లాంట్ ను ఏర్పాటు చేశారు. పనులన్నీ దాదాపు పూర్తి చేసినా అది వినియోగంలోకి రాలేదు. ఓ వైపు ఈ ప్లాంట్ ను వినియోగంలోకి తేకముందే.. అధికారులు మడికొండ డంప్ యార్డులో కొత్తగా మరో విద్యుత్తు ఉత్పత్తి ప్లాంట్ కు ప్రతిపాదనలు సిద్ధం చేయడం ఆశ్చర్యం కలిగిస్తోంది.
సమస్యగా మారుతున్న చెత్త
గ్రేటర్ వరంగల్ లో నిత్యం వెలువడుతున్న చెత్త నగరానికి పెద్ద సమస్యగా మారింది. ఇప్పటికే మడికొండ శివారులోని డంప్ యార్డు పూర్తిగా నిండిపోగా.. అక్కడ చేపట్టిన బయో మైనింగ్ నత్తనడకన సాగుతున్నది. దీంతో రోజువారీగా పోగవుతున్న చెత్తను ట్రీట్మెంట్ చేయడం అధికారులకు సవాల్ గా మారింది. ప్లాంట్ ఉపయోగంలోకి వస్తే విద్యుత్తు ఉత్పత్తి జరగడంతో పాటు డంప్ యార్డుకు వెళ్లే చెత్త ఎంతో కొంత తగ్గే అవకాశం ఉన్నా అధికారులు ఆ దిశగా చర్యలు మాత్రం తీసుకోవడం లేదు.
డంప్ యార్డు నిండిపోయి ఇబ్బందులు
వరంగల్ నగరంలో దాదాపు 2.25 లక్షల ఇండ్లు ఉండగా.. 11 లక్షల వరకు జనాభా నివసిస్తోంది. ఆయా ఇండ్ల నుంచి నిత్యం 350 నుంచి 400 మెట్రిక్ టన్నుల తడి, పొడి చెత్త వెలువడుతోంది. దాన్నంతా మడికొండ-రాంపూర్ గ్రామాల శివారులో దాదాపు 37 ఎకరాల్లో ఏర్పాటు చేసిన డంప్ యార్డుకు తరలిస్తున్నారు. కానీ వస్తున్న చెత్తకు తగ్గట్టుగా వేస్ట్ మేనేజ్మెంట్ లేకపోవడంతో దాదాపు ఐదారు లక్షల టన్నుల వ్యర్థాలతో డంప్ యార్డు నిండిపోయింది.
దీంతోనే యార్డులోని చెత్తను క్లీన్ చేసి, ఎరువుగా మార్చేందుకు రెండేండ్ల కిందట స్మార్ట్ సిటీ ప్రాజెక్టులో భాగంగా రూ.37 కోట్లతో బయో మైనింగ్ ప్రక్రియ చేపట్టారు. డంప్ యార్డులో 3 లక్షల టన్నుల వ్యర్థాలను ట్రీట్మెంట్ చేసేందుకు చెన్నైకి చెందిన ఓ కంపెనీకి కాంట్రాక్ట్ ఇవ్వగా.. వర్షాలు, బిల్లులు, తదితర సమస్యల కారణంగా ఇంతవరకు సగం కూడా పని పూర్తి కాలేదు. దీంతో రోజువారీగా వెలువడుతున్న చెత్త సమస్యగా మారగా.. గత్యంతరం లేక డంప్ యార్డు సిబ్బంది ప్రతిరోజు సాయంత్రం చెత్తకు నిప్పంటిస్తున్నారు. ఫలితంగా ఆ చుట్టుపక్కల ఉన్న మడికొండ, రాంపూర్, మిని టెక్స్ టైల్ పార్క్, మోడల్ కాలనీ, ఎలుకుర్తి గ్రామాల ప్రజలు డంప్ యార్డు పొగతో తీవ్ర ఇబ్బందులు పడుతున్నారు.
మడికొండలో కొత్త పాంట్
మడికొండ డంప్ యార్డులో ఇప్పటికే బయో మైనింగ్ నడుస్తుండగా.. రోజువారీగా వచ్చే చెత్తను శుద్ధి చేయడానికి అది కూడా సరిపోని పరిస్థితి నెలకొంది. దీంతోనే అక్కడే గోబర్ ధన్ స్కీం కింద బయో గ్యాస్ ప్లాంట్ ఏర్పాటుకు గతంలో ప్రతిపాదనలు చేశారు. దాంతో పాటు అక్కడే చెత్త నుంచి విద్యుత్తు తయారు చేసే ప్లాంట్ ను ఏర్పాటు చేసేందుకు కూడా కసరత్తు చేస్తున్నారు. ఈ మేరకు కొద్దిరోజుల కిందట దక్షిణ కొరియా దేశానికి చెందిన సేజింగ్ కంపెనీ ప్రతినిధులు కూడా వచ్చి డంప్ యార్డును పరిశీలించారు. ల్యాండ్ ఫిల్ గ్యాస్ ద్వారా విద్యుత్తును ఉత్పత్తి చేసే విధానాన్ని పవర్ పాయింట్ ప్రజంటేషన్ ద్వారా వివరించి వెళ్లారు.
కాగా అక్కడ విద్యుత్తు ఉత్పత్తి చేసే ప్లాంట్ ఏర్పాటు చేస్తే డంప్ యార్డు సమస్యకు పరిష్కారం దొరికే అవకాశం ఉందని అధికారులు భావిస్తున్నారు. ఇదిలాఉంటే కొత్త ప్రాజెక్టు ప్రతిపాదనల్లో ఉన్న అధికారులు పాత ప్రాజెక్టును పట్టించుకోవడం లేదనే ఆరోపణలు వినిపిస్తున్నాయి. ఇంకా మడికొండ ప్లాంట్ వినియోగంలోకి వచ్చేందుకు మరికొంత సమయం పట్టే అవకాశం ఉండగా.. అప్పటివరకు బాలసముద్రంలోని యూనిట్ ను వినియోగించుకుంటే ఓ వైపు చెత్త ప్రాసెస్ అవడంతో పాటు డంప్ యార్డుపై ఎంతోకొంత భారం తగ్గే అవకాశం ఉంది. దీంతో ఆ దిశగా అధికారులు చర్యలు తీసుకోవాలని నగర ప్రజలు డిమాండ్ చేస్తున్నారు.
ప్లాంట్ పెట్టి వదిలేసిన్రు
నగరంలో వెలువడుతున్న తడి చెత్తను ట్రీట్మెంట్ చేసి, దానిని నుంచి విద్యుత్తు ఉత్పత్తి చేసేందుకు స్వచ్ఛ భారత్ మిషన్ కింద హనుమకొండ బాలసముద్రంలోని జీడబ్ల్యూఎంసీ కమిషనర్ క్యాంప్ ఆఫీస్ ఎదురుగా ఉన్న స్థలంలో బయో మిథనేషన్ కమ్ ఎలక్ట్రిసిటీ జనరేషన్ ప్లాంట్ ఏర్పాటు చేశారు. ఇక్కడ ప్రతి రోజు రెండు టన్నుల వరకు తడి చెత్తను ప్రాసెస్ చేసి, బయో గ్యాస్, విద్యుత్తు ఉత్పత్తి చేసేందుకు ప్లాన్ చేశారు. అనుకున్నట్టుగానే ప్లాంట్ ఏర్పాటు చేసిన అధికారులు దానిని వినియోగంలోకి తేవడంలో మాత్రం నిర్లక్ష్యం వహించారు. ఫలితంగా గత నాలుగైదేండ్ల నుంచి ఆ ప్రాజెక్టు నిరుపయోగంగానే ఉంటోంది. వాస్తవానికి బాలసముద్రంలోని గ్రేటర్ కమిషనర్ క్యాంప్ ఆఫీస్ ఎదుటే ఈ ప్రాజెక్టు ఉన్నా దానిపై ఎవరూ పెద్దగా శ్రద్ధ పెట్టకపోవడం గమనార్హం.
