- పీసీసీ చీఫ్ మహేశ్కుమార్ గౌడ్, మంత్రి పొన్నం ప్రభాకర్
యాదాద్రి, వెలుగు : బీసీ రిజర్వేషన్లు అమలుకాకుండా బీజేపీ అడ్డుకుంటోందని పీసీసీ చీఫ్ మహేశ్కుమార్ గౌడ్, మంత్రి పొన్నం ప్రభాకర్ ఆరోపించారు. బీసీలకు 42 శాతం రిజర్వేషన్ అమలు కోసం ఏఐసీసీ రాష్ట్ర వ్యవహారాల ఇన్చార్జి మీనాక్షి నటరాజన్తో కలిసి పీసీసీ చీఫ్, మంత్రులు పొన్నం ప్రభాకర్, వాకిటి శ్రీహరి ప్రత్యేక రైలులో ఢిల్లీ బయల్దేరారు. ఆలేరు రైల్వే స్టేషన్లో పీసీసీ చీఫ్ సహా మంత్రులు దిగారు. అనంతరం ఆలేరు, భువనగిరిలో వేర్వేరుగా వారు మీడియాతో మాట్లాడారు. బీసీల గొంతుకగా రాహుల్గాంధీ పని చేస్తున్నారని తెలిపారు.
ఆయన ఆదేశాలతోనే తెలంగాణలో కులగణన నిర్వహించి దేశానికి ఆదర్శంగా నిలిచామని చెప్పారు. బీసీల కోసం 42 శాతం రిజర్వేషన్లు కల్పించేందుకు కేబినెట్లో నిర్ణయం తీసుకున్నామని తెలిపారు. అయినప్పటికీ.. ముస్లింలను సాకుగా చూపిస్తూ బీజేపీ రిజర్వేషన్లను అడ్డుకుంటోందని ఆరోపించారు. తెలంగాణలోని బీజేపీ ఎంపీలు, కేంద్రమంత్రులకు బీసీలపై ఏ మాత్రం ప్రేమ లేదన్నారు. కేంద్రంపై ఒత్తిడి తెచ్చేందుకు ఢిల్లీలో నిర్వహించే ఆందోళన కార్యక్రమాలకు అందరూ మద్దతు తెలపాలని కోరారు. వారి వెంట ప్రభుత్వ విప్, ఎమ్మెల్యే బీర్ల ఐలయ్య ఉన్నారు.
