హైదరాబాద్, వెలుగు : బచావత్ ట్రిబ్యునల్ (కేడబ్ల్యూడీటీ –1) కర్నాటకకు చేసిన కృష్ణా నీటి కేటాయింపులకు లోబడే అప్పర్భద్ర ప్రాజెక్టుకు అనుమతులిచ్చామని కేంద్ర జలశక్తి శాఖ మంత్రి బిశ్వేశ్వర్ తుడు తెలిపారు. రాజ్యసభలో వైసీపీ ఎంపీ విజయసాయి రెడ్డి అడిగిన ప్రశ్నకు ఆయన లిఖితపూర్వక సమాధానమిచ్చారు. ఈ ప్రాజెక్టును జాతీయ ప్రాజెక్టుల జాబితాలో చేర్చాలని హై పవర్ స్టీరింగ్ కమిటీ సిఫార్సు చేసిందన్నారు. బచావత్ ట్రిబ్యునల్ రాయలసీమతో పాటు కృష్ణా బేసిన్లోని వివిధ రీజియన్లకు చేసిన నీటి కేటాయింపులపై అప్పర్భద్ర ప్రభావం చూపబోదన్నారు. ఏదైన రాష్ట్రం తమకు చేసిన కేటాయింపులకు లోబడి ప్రాజెక్టు చేపడితే దానికి అనుమతులివ్వడానికి ఇంటర్ స్టేట్ అంశాలను పరిగణలోకి తీసుకొని తీరాలని సీడబ్ల్యూసీ నిబంధనల్లో లేదన్నారు.
