నేరడిగొండ, వెలుగు: సీపీఆర్ ప్రక్రియపై ప్రతి ఒక్కరూ అవగాహన కలిగి ఉండాలని నేరడిగొండ పీహెచ్సీ డాక్టర్ ఎండీ సద్దాం అన్నారు. మండల కేంద్రంలోని ప్రభుత్వ జూనియర్ కాలేజీలో సీపీఆర్ విధానంపై శుక్రవారం ఆయన విద్యార్థులకు అవగాహన కల్పించారు. గుండెపోటు వచ్చినప్పుడు, శ్వాస తీసుకోవడంలో ఇబ్బంది పడినప్పుడు సీపీఆర్ చేయడం ఎంతో ముఖ్యమన్నారు.
గుండెపోటు వచ్చిన వ్యక్తిని ముందుగా సేఫ్ ప్లేస్ కు తరలించి, రోగి కుడి వైపున నిలబడి రెండు నిమిషాల్లో 100 నుంచి 120 సార్లు గుండెపై బలంగా నొక్కాలని ప్రయోగాత్మకంగా వివరించారు. అత్యవసర పరిస్థితిల్లో సీపీఆర్ ఓ వ్యక్తి జీవితాన్ని నిలబెడుతుందని, ఆపదలో ఉన్న వారిని సీపీఆర్ చేసి కాపాడాలని సూచించారు. కార్యక్రమంలో ఇన్ చార్జి ప్రిన్సిపాల్ ఎం.స్వామి, ఆరోగ్య కాలేజీ నోడల్ ఆఫీసర్ ఉపేందర్ రెడ్డి, హెచ్ఆర్ఓ రవీందర్, హెల్త్ సూపర్వైజర్ సంతోష్, హెల్త్ అసిస్టెంట్ సాయన్న, లెక్చరర్లు తదితరులు పాల్గొన్నారు.
