పార్లమెంట్​లో అన్నీ చర్చిద్దాం: ప్రధాని

• ఆల్ పార్టీ మీటింగ్​లో మోడీ
• భేటీకి 27 పార్టీల నేతల హాజరు
•  ఫరూఖ్ అబ్దుల్లాను విడుదల చేయాలని అపొజిషన్ డిమాండ్
• ఇవ్వాల్టి నుంచే వింటర్ సెషన్స్

న్యూఢిల్లీ:

పార్లమెంట్ శీతాకాల సమావేశాల్లో అన్ని అంశాలపై చర్చించేందుకు సిద్ధంగా ఉన్నామని ప్రధాని నరేంద్ర మోడీ చెప్పారు. గత సమావేశాల మాదిరే ఈ సారి కూడా ప్రొడక్టివ్​గా సెషన్స్ సాగాలని ఆయన పిలుపునిచ్చారు. పార్లమెంటు రూల్స్, ప్రొసీజర్ల ఫ్రేమ్​వర్క్ ప్రకారం అన్ని సమస్యలపై చర్చిస్తామని స్పష్టం చేశారు. సభలో జరిగే నిర్మాణాత్మక చర్చ.. బ్యూరోక్రసీని కూడా అలర్ట్​గా ఉంచుతుందన్నారు. సోమవారం నుంచి పార్లమెంట్ సెషన్స్ ప్రారంభం కానుండటంతో.. ఆదివారం ఆల్ పార్టీ మీటింగ్ నిర్వహించారు. పలు అంశాలపై చర్చించారు. పార్లమెంటరీ వ్యవహారాల మంత్రి ప్రహ్లాద్ జోషీ ఆధ్వర్యంలో జరిగిన ఈ భేటీకి.. 27 పార్టీల నేతలు హాజరయ్యారు.

ఫరూఖ్​ను విడుదల చేయాలె..

నేషనల్ కాన్ఫరెన్స్ నేత, లోక్​సభ ఎంపీ ఫరూఖ్ అబ్దుల్లాను గృహ నిర్బంధం నుంచి విడుదల చేయాలని ప్రతిపక్షాలు డిమాండ్ చేశాయి. పార్లమెంట్ సమావేశాలకు ఆయన హాజరయ్యేందుకు అనుమతి కల్పించాలని కోరాయి. అయితే దీనిపై ప్రభుత్వం నుంచి వెంటనే ఎలాంటి స్పందన రాలేదని సమాచారం. ‘‘ఒక పార్లమెంటేరియన్​ను అక్రమంగా ఎలా బంధిస్తారు. ఆయన పార్లమెంటులో హాజరయ్యేందుకు అనుమతివ్వాలి’’ అని రాజ్యసభలో ప్రతిపక్ష నేత గులామ్ నబీ ఆజాద్ డిమాండ్ చేశారు. పబ్లిక్ సేఫ్టీ యాక్ట్ కింద చాలా రోజులుగా ఫరూఖ్ అబ్దుల్లాను గృహ నిర్బంధంలో ఉంచారు. లోక్​సభలో కాంగ్రెస్ పక్ష నేత అధిర్ రంజన్ చౌధురి మాట్లాడుతూ.. ఎకనామిక్ స్లో డౌన్, నిరుద్యోగం, వ్యవసాయ సమస్యలపై కచ్చితంగా చర్చ జరగాలని స్పష్టం చేశారు. సోమవారం నుంచి ప్రారంభం కానున్న సమావేశాలు డిసెంబర్ 13 వరకు కొనసాగుతాయి.