పిల్లల్ని, ఆడవాళ్లను కిడ్నాప్ చేసి అక్రమంగా రవాణా చేసే నేరస్థుడతను. పోలీసులకు చిక్కాడు. సిచువాన్ ప్రావిన్స్లోని లేబర్ క్యాంప్లో శిక్ష అనుభవిస్తున్నాడు. కానీ 2002లో టైం చూసి తప్పించుకున్నాడు. 17 ఏళ్లుగా పోలీసులకు దొరక్కుండా మనుషులకు కూడా కనబడని యంగ్షన్ ప్రాంతంలోని ఓ ఇరుకైన గుహలో తలదాచుకుంటున్నాడు. అతడి పేరు సాంగ్ జియాంగ్. ఇప్పుడతనికి 63 ఏళ్లు. అతని గురించి సెప్టెంబర్లో పోలీసులకు సమాచారం అందింది. తన సొంతూరు యునాన్ ప్రావిన్స్ను ఆనుకుని ఉన్న కొండల్లో ఉన్నాడని తెలుసుకున్న పోలీసులు పట్టుకునేందుకు ట్రై చేశారు. కానీ ఆ కాకులు దూరని కారడవిలో ఎంత ప్రయత్నించినా సాంగ్ జాడ కనుక్కోలేకపోయారు. ఇట్ల కాదనుకొని డ్రోన్తో ట్రై చేశారు. నీలం రంగు బోర్డు ఉన్న ఓ ప్రదేశాన్ని, దానికి దగ్గర్లోనే చెత్తను గమనించారు. ఇంకేముంది ఆ ప్రాంతానికి వెళ్లి సెర్చ్ చేయగా మనోడు దొరికాడు. ఏళ్లుగా జనాలతో మాట్లాడకపోవడంతో పోలీసులతో మాట్లాడేందుకు సాంగ్ కష్టపడ్డాడు. పక్కనే ఉన్న నది నుంచి ప్లాస్టిక్ బాటిళ్లతో అతడు నీళ్లు తెచ్చుకునే వాడని, చెట్ల కొమ్మలతో నిప్పు రాజేసేవాడని తెలిసింది.
