కొండాపూర్/సంగారెడ్డి టౌన్, వెలుగు: పేదల భూములు గుంజుకుని రీజనల్ రింగ్రోడ్డు వేయడం కరెక్ట్ కాదని టీజేఎస్అధ్యక్షుడు ప్రొ.కోదండరాం చెప్పారు. సీఎం కేసీఆర్ సామాన్య రైతుల బతుకులను బజారుకీడుస్తూ మరో నిజాం పాలన కొనసాగి స్తున్నారని మండిపడ్డారు. ట్రిపుల్ ఆర్ భూనిర్వాసితులకు మద్దతుగా సంగారెడ్డి జిల్లా టీజేఎస్అధ్యక్షుడు తుల్జారెడ్డి ఆధ్వర్యంలో సోమవారం గిర్మాపూర్ నుంచి సంగారెడ్డి కలెక్టరేట్ వరకు పాదయాత్ర చేపట్టారు. కోదండరాం పాల్గొని మాట్లాడారు. ఉమ్మడి మెదక్ జిల్లాకు చెందిన సీఎం, ఇద్దరు మంత్రులు రియల్ఎస్టేట్వ్యాపారులకు లాభం చేకూర్చేందుకు విచ్చలవిడిగా భూములు గుంజుకుంటున్నారని ఆరోపించారు. ఇప్పటికే ప్రాజెక్టులు, రోడ్ల పేరుతో 9 వేల ఎకరాలు గుంజుకున్నారన్నారు. భూసేకరణకు ఉమ్మడి మెదక్ అడ్డాగా మారిందని ఆందోళన వ్యక్తం చేశారు. ట్రిపుల్ ఆర్ పేరుతో నర్సరీలు, తోటలు పెంచుకుంటూ బతుకుతున్న 300 మంది రైతుల కుటుంబాలను రోడ్డున పడేసే ప్రయత్నం చేస్తున్నారని ఆరోపించారు. రోడ్డు కోసం 6 గ్రామాల్లో భూసేకరణ చేస్తే 2013 భూసేకరణ చట్టం ప్రకారం పరిహారం చెల్లించాలని డిమాండ్ చేశారు. నష్టపోతున్న రైతుల పక్షాన తమ పోరాటం కొనసాగిస్తామని స్పష్టం చేశారు.
యాదగిరి గుట్టలో సర్వే అడ్డగింత
యాదాద్రి: రీజనల్రింగ్రోడ్డు అలైన్మెంట్మార్చేంత వరకు సర్వేను అడ్డుకుంటూనే ఉంటామని యాదాద్రి జిల్లాలోని ఎర్రంబెల్లి రైతులు తేల్చి చెప్పారు. సోమవారం ఉదయం గ్రామానికి వచ్చిన సర్వే బృందాన్ని రైతులు అడ్డుకున్నారు. అలైన్మెంట్ మార్చాలంటూ వాగ్వాదానికి దిగారు. ఇప్పటికే మూడుసార్లు భూములు తీసుకున్నారని, ఇంకెన్నిమార్లు తీసుకుంటారని నిలదీశారు. తెలంగాణ వచ్చినంక చదువుకున్నోళ్లకు ఉద్యోగాలు ఇస్తలేరని కనీసం భూమి దున్నుకొని బతుకుదామంటే లాక్కుంటున్నారని యువరైతులు ఆవేదన వ్యక్తం చేశారు. దీంతో సర్వే సిబ్బంది అక్కడ్నుంచి వెళ్లిపోయారు.
