మహబూబ్నగర్, వెలుగు: సీఎం కేసీఆర్ మహబూబ్నగర్ పర్యటనలో నిరసనలు వెలువెత్తాయి. ఆదివారం సాయంత్రం సభలో సీఎం ప్రసంగిస్తుండగా.. 2017 టీఆర్టీలో మిగిలిపోయిన ఉర్దూ మీడియం ఉపాధ్యాయ పోస్టులను మెరిట్ వాళ్లతో భర్తీ చేయాలని అభ్యర్థులు ప్లకార్డులు ప్రదర్శించారు. దాదాపు పది నిమిషాల పాటు వీరు ప్లకార్డులతో నిరసన తెలిపారు. పోలీసులు వచ్చి.. వారి చేతులో ఉన్న ప్లకార్డులను గుంజుకున్నారు. మధ్యాహ్నం జడ్చర్ల మీదుగా సీఎం కాన్వాయ్ వస్తుండగా.. జడ్చర్ల బీజేవైఎం నాయకులు అడ్డుకునే ప్రయత్నం చేశారు. వారిని పోలీసులు పక్కకు లాగేశారు. దీంతో ప్లకార్డులు ప్రదర్శించారు.
ఉమ్మడి పాలమూరు జిల్లావ్యాప్తంగా మూడు రోజులుగా పోలీసులు బీజేపీ, కాంగ్రెస్ లీడర్లను ముందస్తు అరెస్టులు చేశారు. ఆదివారం కూడా బీజేపీ జిల్లా అధ్యక్షుడు వీరబ్రహ్మచారిని, మరికొందరు లీడర్లను అరెస్టు చేసి జడ్చర్ల లోని పోలీస్ ట్రైనింగ్ క్యాంపు కార్యాలయానికి తరలించారు. జిల్లా కేంద్రంలో సీఐటీయూ లీడర్ కురుమూర్తిని, మరికొందరిని ముందస్తు అరెస్టు చేశారు.
