ఇటీవలి కాలంలో దొంగతనాలు, మహిళ మెడలో నుంచి గొలుసు లాక్కొని వెళ్లడాలు రోజురోజుకూ ఎక్కువవుతున్నాయి. మామూలు సందర్భాల్లో ఎన్నో చెప్తూ ఉంటాం.. దొంగలు వచ్చినపుడు ఇలా చేయాలి.. అలా ఎదుర్కోవాలి అని. కానీ ఆ సందర్భం వచ్చేసరికి అసలు ఏం చేయాలో కూడా తట్టదు. కానీ ఓ పదేళ్ల చిన్నారి మాత్రం తన ధైర్య సాహసాలతో దొంగలతో పోరాడి, వారిని పారిపోయేట్టు చేసింది. పూణెలోని మోడల్ కాలనీ ప్రాంతంలో ఓ వృద్ధురాలి గొలుసును లాక్కునేందుకు బైక్‌పై వెళ్తున్న వ్యక్తి ప్రయత్నించాడు.
అక్కడే ఉండి ఇదంతా గమనిస్తోన్న ఆమె మనవరాలు,10 ఏళ్ల బాలిక ఆ దొంగలతో పోరాడింది. తన చేతిలో ఉన్న బ్యాగుతో వాళ్లను కొట్టి, తరిమేసింది. ఫిబ్రవరి 25న జరిగిన ఈ ఘటన సీసీ కెమెరాల్లో రికార్డయ్యింది. దీంతో ఈ విషయం తాజాగా వెలుగులోకి వచ్చింది. ఈ ఘటనపై వాళ్లు పోలీసులకు కూడా ఫిర్యాదు చేశారు. బాధితుల ఫిర్యాదు మేరకు ఐపీసీ సెక్షన్ 393 కింద పూణె పోలీసులు గుర్తు తెలియని వ్యక్తిపై కేసు నమోదు చేసి, దర్యాప్తు చేస్తున్నారు.
