- మరియుపోల్ స్టీల్ ప్లాంట్లోకి రష్యా సోల్జర్లు చొచ్చుకెళ్లారన్న ఉక్రెయిన్
- లోపలున్న వారిని చంపాలని చూస్తున్నారంటూ ఆరోపణ
- ప్లాంటులోకి వెళ్లలేదని, తమ సేనలు ఇంకా వేచి ఉన్నాయన్న రష్యా
లవీవ్(ఉక్రెయిన్): మరియుపోల్ సిటీలో ఉన్న అజోవ్ స్టల్ స్టీల్ ప్లాంటు నుంచి ఒకవైపు ప్రజల తరలింపు కొనసాగుతుండగా.. మరోవైపు రష్యన్ బలగాలు ఆ ప్లాంటులోకి చొచ్చుకెళ్లాయని ఉక్రెయిన్ వెల్లడించింది. స్టీల్ ప్లాంట్ లో ఉన్న వారందరినీ చంపేందుకు రష్యన్ సైనికులు ప్రయత్నిస్తున్నారని ఆరోపించింది. స్టీల్ ప్లాంట్ పై దాడులకు సంబంధించి రష్యా మాట తప్పిందని ఉక్రెయిన్ కమాండర్ ఒకరు అన్నారు. అయితే ఉక్రెయిన్ ఆరోపణలను రష్యా ఖండించింది. తమ బలగాలు ప్లాంట్లోకి చొచ్చుకెళ్లాయనేది అబద్ధమని, అధ్యక్షుడు పుతిన్ ఆదేశాల మేరకు తమ సైనికులు ఇంకా వేచి చూస్తున్నారని స్పష్టం చేసింది. స్టీల్ ప్లాంట్ లో నుంచి పౌరులను తరలించే మానవతా కారిడార్లు ఇంకా పనిచేస్తున్నాయని తెలిపింది. ప్లాంట్లోకి చొచ్చుకెళ్లడం లేదని స్పష్టం చేసింది. మరియుపోల్ మొత్తం రష్యా వశమైనా.. ఒక్క అజోవ్స్టల్ స్టీల్ ప్లాంట్ మాత్రం ఇంకా ఉక్రెయిన్ సేనల అధీనంలోనే ఉన్న సంగతి తెలిసిందే. ప్లాంట్లోని బంకర్లు, టన్నెల్స్లో తలదాచుకున్న రెండు వేల మంది ఉక్రెయిన్ డిఫెండర్లు, సోల్జర్లు ఇంకా పోరాటం కొనసాగిస్తున్నారు. మరోవైపు మరియుపోల్ నుంచి 300 మంది పౌరులను సమీపంలోని నాలుగు గ్రామాలకు తరలించినట్టు ఐక్యరాజ్యసమితి వెల్లడించింది.
ఫండ్ రైజింగ్ ప్లాట్ఫామ్ ఏర్పాటు
యుద్ధంలో ఉక్రెయిన్ కు సహాయం అందజేసేందుకు వీలుగా అంతర్జాతీయ ఫండ్ రైజింగ్ ప్లాట్ఫామ్ను ఆ దేశ అధ్యక్షుడు వొలోదిమిర్ జెలెన్స్కీ ప్రారంభించారు. దీని ద్వారా తమ దేశానికి సాధ్యమైనంత సహాయం అందించాలని ఆయన కోరారు. ఉక్రెయిన్లో మానవతా సంక్షోభాన్ని ఎదుర్కోవడంతో పాటు యుద్ధంలో గెలవడానికి ఈ నిధులను ఉపయోగిస్తామన్నారు.
అణ్వాయుధ మిసైల్స్ ను టెస్ట్ చేస్తున్నం: రష్యా
అణ్వాయుధాలను మోసుకెళ్లగల మిస్సైల్స్ను తమ బలగాలు పరీక్షిస్తున్నాయని రష్యా వెల్లడించింది. కలినింగ్గార్డ్ ప్రాంతంలో ఈ ప్రక్రియ కొనసాగుతోందని పేర్కొంది. ఉక్రెయిన్తో యుద్ధం కొనసాగుతుండటం, ఇప్పటికే అణు బాంబుల ప్రయోగానికీ వెనకాడబోమని రష్యా అధ్యక్షుడు పుతిన్ హెచ్చరించిన నేపథ్యంలో అణ్వాయుధాలతో రిహార్సల్స్ కూడా జరుపుతుండటం ఆందోళనకరంగా మారింది. ఉక్రెయిన్కు విదేశాలు ఆయుధాలు సమకూర్చడం వల్లే ఈ సంక్షోభానికి ముగింపు ఆలస్యమవుతోందని రష్యా రక్షణ శాఖ తెలిపింది.
