- జగిత్యాల జిల్లా బీర్పూర్ మండలం చిన్న కొల్వైలో 57 ఓట్లు వేస్తే సర్పంచ్ అయ్యే చాన్స్
- తక్కువ ఓట్లు ఉన్నా.. పోటీకి సై అంటున్న పలువురు
కరీంనగర్, వెలుగు: ఈ రోజుల్లో ఎన్నికలంటేనే పార్టీల మద్దతు, కుల సమీకరణలు, యువజన, మహిళా సంఘాలకు దావత్‌‌లు, తాయిలాలు, ఓటుకు నోట్లుగా మారిపోయాయి. సర్పంచ్ పదవి కోసం చిన్న గ్రామాల్లో తక్కువలో తక్కువ 5 లక్షలు.. మేజర్ గ్రామపంచాయతీలైతే రూ.20 లక్షల నుంచి రూ.50 లక్షల వరకు కూడా ఖర్చు చేసే లీడర్లు ఉన్నారు.
కానీ 250 నుంచి 500 ఓటర్లలోపు ఉన్నచిన్న పల్లెల్లో మాత్రం 100, 200, 300 ఓట్లతోనే సర్పంచ్ పదవి దక్కనుంది. మేజర్ జీపీల్లో ఉండే ఒక వార్డు స్థాయి ఓట్లతోనే సర్పంచ్ అయ్యే అదృష్టం దక్కనుంది. కరీంనగర్ జిల్లాలో ఇలాంటి జీపీలు 24 వరకు ఉండగా, జగిత్యాల జిల్లాలో 33, రాజన్న సిరిసిల్ల జిల్లాలో 21 పంచాయతీలు ఉన్నాయి. కాగా పెద్దపల్లి జిల్లాలో 500 మందికి ఓటర్లు ఉన్నారు.
కరీంనగర్ జిల్లాలో..
చొప్పదండి మండలం కోనేరుపల్లి గ్రామంలో 347 మంది ఓటర్లు ఉండగా.. అన్ని ఓట్లు పోలైనా 174 ఓట్లు వచ్చినవారు సర్పంచ్. జమ్మికుంట మండలం పాపయ్యపల్లి గ్రామంలో 480 మంది ఓటర్లు, ఇల్లందకుంట మండలం వాగోడు–రామన్న పల్లి గ్రామంలో 400 మంది ఓటర్లు ఉన్నారు. కరీంనగర్ రూరల్ మండలం తాహెర్ కొండాపూర్ గ్రామంలో 436 మంది ఓటర్లు, నల్లగుంటపల్లి గ్రామంలో 481 మంది ఓటర్లు, సైదాపూర్ మండలం గర్రెపల్లి గ్రామంలో 383 మంది ఓటర్లు ఉన్నారు.
శంకరపట్నం మండలంలో అతి తక్కువగా నల్లవెంకయ్యపల్లి జీపీలో 246 మంది, మక్తలో 264 మంది, గూడాటిపల్లిలో 275 మంది ఓటర్లు ఉన్నారు. ఇదే మండలంలోని అంబేద్కర్ నగర్ లో 386 మంది, ఆర్కండ్లలో 452 మంది, కల్వల జీపీలో 345 మంది ఓటర్లు మాత్రమే ఉన్నారు. మానకొండూరు మండలం పెద్దూరుపల్లి లో 282 ఓట్లు, రాఘవాపూర్ లో 342 ఓట్లు, బంజెరుపల్లి జీపీలో 310 ఓట్లు మాత్రమే ఉన్నాయి.
జగిత్యాలలో 33 గ్రామ పంచాయతీలు
జగిత్యాల, వెలుగు: జగిత్యాల జిల్లాలో 500 మంది లోపు ఓటర్లు ఉన్న గ్రామాలు 33 ఉన్నాయి. బీర్పూర్ మండలం కందెనకుంటలో 217 ఓట్లు, గొండుగూడెం 247 ఓట్లు, ఇందిరానగర్ 308 ఓట్లు, చిత్రావేణి గూడెంలో 415 ఓట్లు, చెర్లపల్లిలో 427 ఓట్లు మాత్రమే ఉన్నాయి. బుగ్గారం మండలం చందయ్యపల్లి 250, ధర్మపురి మండలం బోదరినక్కల చెరువుగూడెంలో 196 ఓట్లు, అక్సైపల్లిలో 285 ఓట్లు, , డుబ్బాలగూడెంలో 293, ఇబ్రహీంపట్నం తీంపపూర్ తండాలో261, జగిత్యాల రూరల్ మండలం చెర్లపల్లిలో 281, గొల్లపల్లిలో 365, హైదర్ పల్లిలో 391 ఓట్లు ఉన్నాయి.
మల్యాల మండలం హుస్సేన్ నగర్ లో 357 ఓట్లు, ఒబులాపూర్ తండాలో 311, మెట్‌‌పల్లి మండలం ఆసర్ తండాలో 297 ఓట్లు, కృష్ణచంద్ర తండాలో 333, పటిమిడి తండాలో 311, రామరావుపల్లిలో 359, రాయికల్ మండలం కైరిగూడెంలో 170 ఓట్లు, శ్రీరామనగర్ లో 255 ఓట్లు ఉన్నాయి. సారంగపూర్ మండలం భీమా రెడ్డి గూడెంలో 189, ధర్మనాయక తండలో 362, నాయకపు గూడెంలో185 ఓట్లు మాత్రమే ఉన్నాయి. ఈ గ్రామాల్లో ఎన్నికలు ఏకగ్రీవం అయితే ప్రభుత్వం ఇచ్చే నజరానాలపై గ్రామస్తులు ఆశలు పెట్టుకున్నారు.
రాజన్న సిరిసిల్ల జిల్లాలో..
రాజన్నసిరిసిల్ల, వెలుగు: జిల్లాలో 21 జీపీల్లో 500లోపు ఓటర్లు ఉన్నారు. సిరిసిల్ల మండలం బాబాయ్ చెరువుతాండ జీపీలో 330 ఓట్లు, ఎర్రగడ్డ తండాలో 402, మద్దిమల్లలో 386 ఓట్లు మాత్రమే ఉన్నాయి. చందుర్తి మండలం కొత్తపేట గ్రామంలో 200, దేవుని తండాలో 330, వేములవాడ రూరల్ మండలం వెంకటాంపల్లిలో 308, తుర్కాషినగర్ లో 375, రుద్రంగి మండలం అడ్డబోర్ తండాలో 317, చింతామణి తండాలో 398, గైది గుట్ట తండాలో 307, రూప్లా నాయక్ తండాలో 309, వీరుని తండాలో 278 ఓట్లు మాత్ర ఉన్నారు. ముస్తాబాద్ మండలం గోపాల్ పల్లిలో 262, రాంరెడ్డిపల్లె గ్రామంలో 330, రామలక్ష్మణ్‌‌పల్లె గ్రామంలో 335, మొఱ్ఱపూర్ తండాలో 380, గన్నేవారిపల్లెలో 468 ఓట్లు మాత్రమే ఉన్నాయి.
108 ఓట్లతోనే గెలుపు..
కరీంనగర్ జిల్లా గన్నేరువరం మండలంలో ఆరు జీపీల్లో 500లోపు ఓటర్లు ఉన్నారు. సాంబయ్యపల్లె జీపీలో అతి తక్కువగా 215 ఓట్లు మాత్రమే ఉన్నాయి. ఈ గ్రామంలో 108 ఓట్లతోనే సర్పంచ్ అయ్యే అవకాశం ఉంది. ఇద్దరి కంటే ఎక్కువ మంది పోటీలో ఉంటే అంతకంటే తక్కువగా ఓట్లు సంపాదించినా గెలవొచ్చు. ఇదే మండలంలోని యాస్వాడలో 230 ఓట్లు ఉన్నాయి. ఇక్కడ 116 ఓట్లు వస్తే సర్పంచ్ పదవి దక్కినట్లే.
57 ఓట్లతోనే సర్పంచ్..
జగిత్యాల జిల్లా బీర్పూర్ మండలంలో జిల్లాలోనే అతి తక్కువగా చిన్న కొల్వై జీపీలో 112 ఓట్లు మాత్రమే ఉన్నాయి. ఇక్కడ ఇద్దరు పోటీ చేస్తే 57 ఓట్లు వచ్చిన వ్యక్తి సర్పంచ్ కావొచ్చు. ఇంకా ఎక్కువ మంది పోటీలో ఉంటే తక్కువ ఓట్లతోనే బయటపడొచ్చు. మేజర్ జీపీల్లో ఒక వార్డుతో పోలిస్తే ఈ జీపీ పరిధి తక్కువే.
