కోల్బెల్ట్, వెలుగు: మంచిర్యాల జిల్లా బెల్లంపల్లిలోని శాంతిఖని లాంగ్వాల్ ప్రాజెక్టు అండర్గ్రౌండ్ కోల్మైన్కు కేంద్ర పర్యావరణ, అటవీ, వాతావరణ మార్పుల మంత్రిత్వశాఖ రీవాలిడేషన్ ఎన్విరాన్మెంట్ క్లియరెన్స్ (ఈసీ)ను పొడిగిస్తూ ఉత్తర్వులు జారీ చేసింది. బెల్లంపల్లి మండలం అకెనపల్లి సమీపంలో శాంతిఖని ఏర్పాటైంది. ప్రస్తుతం గని లాంగ్వాల్ ప్రాజెక్టుగా రూపుదిద్దుకుంటుంది. లాంగ్వాల్ ప్రాజెక్టుకు వార్షిక బొగ్గు ఉత్పత్తి కెపాసిటీ 0.8 మిలియన్ టన్నుల నుంచి 1.167 మిలియన్ టన్నులకు పెంచుతూ కేంద్ర పర్యావరణ, అటవీ మంత్రిత్వశాఖ 24 జనవరి 2006న పర్యావరణ అనుమతులు (ఈసీ) మంజూరు చేసింది.
ఎన్విరాన్మెంట్ క్లియరెన్స్ ప్రకారం శాంతిఖని గనిలో ఏటా 1.16 మిలియన్ టన్నుల బొగ్గు ఉత్పత్తి కెపాసిటీతో లీజ్కు తీసుకున్న 681.23 హెక్టార్లలో బొగ్గు ఉత్పత్తి చేపట్టింది. ఈ దశలో గని ఎన్విరాన్మెంట్ పర్మిషన్ గడువు ముగియడంతో 2018 పర్యావరణ చట్టం ప్రకారం పర్మిషన్ పునరుద్ధరణ కోసం సింగరేణి యాజమాన్యం గతేడాది మార్చి 6న ప్రజాభిప్రాయసేకరణ నిర్వహించింది. ఈ నేపథ్యంలో మంగళవారం అనుమతులు లభించాయి. దీంతో గనికి కేటాయించిన 681.23 హెక్టార్లలో మైనింగ్ కార్యకలాపాలు యథావిధిగా కొనసాగుతాయని మందమర్రి ఏరియా సింగరేణి జీఎం ఎన్.రాధాకృష్ణ తెలిపారు.
