సూర్యాపేట జిల్లా: సర్పంచ్ ఎన్నికల్లో పోటీ చేసేందుకు ఒక ఎస్ఐ ఉద్యోగానికి రాజీనామా చేశారు. సర్పంచ్ ఎన్నికల్లో పోటీ కోసం ఎస్సై పులి వెంకటేశ్వర్లు స్వచ్ఛంద పదవి విరమణ చేయడం స్థానికంగా చర్చనీయాంశమైంది. ఇంకా 5 నెలలు సర్వీస్ ఉండగానే ఆయన వీఆర్ఎస్ తీసుకున్నారు. కోదాడ మండలం గుడిబండ గ్రామం నుంచి పోటీకి ఎస్సై వెంకటేశ్వర్లు సిద్ధమవుతున్నారు.
మొదటి దశ పంచాయతీ ఎన్నికల నామినేషన్ల ప్రక్రియ ఊపందుకుంది. ఇదిలా ఉండగా.. ఉమ్మడి నల్గొండ జిల్లాలో పల్లె పాలిటిక్స్ వేడెక్కాయి. తమకు చాన్సివ్వాలని కోరుతూ ఎమ్మెల్యేలు, లీడర్లకు వినతులు ఇస్తున్నారు. ఎక్కడికక్కడ మీటింగ్లు.. ఎవరెవరికి టికెట్లు దక్కుతాయి. టికెట్లు దక్కకున్నా.. నామినేషన్లు వేస్తారా..? అన్న అంశంపై చర్చలు జరుగుతున్నాయి.
పంచాయతీ ఎన్నికలపై ప్రధాన పార్టీలైన కాంగ్రెస్, బీఆర్ఎస్, బీజేపీ మండలాలు, గ్రామాల వారీగా ఎక్కడికక్కడ మీటింగ్లు నిర్వహిస్తున్నారు. టికెట్ ఆశిస్తున్న వ్యక్తుల బలమెంత..? ఆర్థికంగా బలంగా ఉన్నాడా..? వంటి అంశాలను తెలుసుకుంటున్నారు. ఆశించే వ్యక్తులకు గెలిచే అవకాశాలు ఉన్నాయా..? లేకుంటే ఎవరికి ఇవ్వాలన్న దానిపై ఆరా తీస్తున్నాయి. అయితే కొన్ని చోట్ల పది మంది వరకూ పోటీ పడుతుండడం ఇబ్బందికరంగా మారింది. దీంతో పల్లె రాజకీయాలు వేడెక్కుతున్నాయి.
