ముంబై/ధారాశివ్: మహారాష్ట్రలో దీపావళి వేడుకలు తీవ్ర విషాదాన్ని నింపాయి. ధారాశివ్ జిల్లాలో జరిగిన ఘోర అగ్నిప్రమాదంలో ఒకే కుటుంబానికి చెందిన ఆరుగురు ఊపిరాడక మృతి చెందారు. జిల్లాలోని యెడ్షి ప్రాంతంలోని ఓ భవనం గ్రౌండ్ ఫ్లోర్‌‌‌‌‌‌‌‌లో దుకాణం ఉండగా, మొదటి అంతస్తులో యజమాని కుటుంబం నివసిస్తోంది. ఆదివారం అర్ధరాత్రి దాటిన తర్వాత మొదటి అంతస్తులోని నివాసంలో మంటలు చెలరేగాయి. గ్రౌండ్ ఫ్లోర్లోని షాపుకు మంటలు విస్తరించాయి. మంటల కారణంగా భవనం మొత్తం పొగతో నిండిపోయింది. దీంతో మొదటి అంతస్తులోని ఇంట్లో నిద్రిస్తున్న ఆరుగురు నిద్రలోనే ప్రాణాలు కోల్పోయారు. దీపావళి సందర్భంగా ఇంటి ఆవరణలో వెలిగించిన ప్రమిద వల్లే ఈ అగ్నిప్రమాదం జరిగి ఉండొచ్చని పోలీసులు అనుమానిస్తున్నారు.
