ఏటూరునాగారం, వెలుగు: త్వరలో జరగనున్న పీఎల్జీఏ వారోత్సవాలకు సంబంధించిన పాంప్లెంట్లను ఛత్తీస్ఘడ్ నుంచి తెస్తున్న ఆరుగురు మిలీషియా సభ్యులను ములుగు జిల్లాలోని వెంకటాపురం పోలీసులు అరెస్ట్చేశారు. మంగళవారం ఏటూరునాగారంలో ఏఎస్పీ అశోక్ కుమార్ వివరాలు వెల్లడించారు. సోమవారం ముత్తారం క్రాస్రోడ్డులో వాహనాల తనిఖీ చేస్తున్న పోలీసులను చూసి పారిపోతున్న సీతారాంపురం, కలిపాకకు చెందిన కుర్మం రాంబాబు, బడిసే బాలరాజు, కుంజ శంకర్, కుర్మం మల్లయ్య, గట్టుపల్లి రాంబాబు, కోరాం సత్యంను పోలీసులు పట్టుకున్నారు. విచారణలో మిలీషియా సభ్యులని తెలిసింది. వెంకటాపురం,-వాజేడు ఏరియా మావోయిస్టు కమిటీ సెక్రెటరీ సుధాకర్ ఆదేశాలతో ఛత్తీస్ ఘడ్ లోని ఉట్లపల్లి అటవీ ప్రాంతానికి వెళ్లి పాంప్లెంట్లు తెచ్చినట్లు చెప్పారు. ఆలుబాక సమీపంలో అంటిచాల్సి ఉండగా పోలీసులు అరెస్ట్ చేశారు.
వారోత్సవాలను సక్సెస్చేయాలి
భద్రాద్రికొత్తగూడెం: పీఎల్ జీఏ వారోత్సవాలను విజయవంతం చేయాలని మావోయిస్టు చర్ల–శబరి ఏరియా కమిటీ సెక్రెటరీ అరుణ మంగళవారం ఓ ప్రకటనలో కోరారు. వచ్చే నెల 2 నుంచి 8వ తేదీ వరకు గ్రామగ్రామనా నిర్వహించాలని కోరారు. కూంబింగ్పేర గిరిజనులను పోలీసులు వేధిస్తున్నారని ఆరోపించారు. పోడు భూముల పట్టాల పేరుతో రాష్ట్ర ప్రభుత్వం డ్రామాలాడుతోందన్నారు. దోపిడీ రాజ్యం నుంచి ప్రజలను విముక్తి చేయడమే మావోయిస్టుల లక్ష్యమన్నారు.
