కోల్‌కతా: ఆన్‌లైన్‌లో బాడీ షేమింగ్, లైంగిక వేధింపులపై టీమిండియా మాజీ క్రికెటర్ సౌరవ్ గంగూలీ భార్య డోనా గంగూలీ పోలీసులకు ఫిర్యాదు చేశారు. డోనా గంగూలీ కంప్లైంట్ మేరకు ఠాకూర్ పుకూర్ స్టేషన్‌ పోలీసులు కేసు నమోదు చేసి దర్యాప్తు చేపట్టారు. ప్రముఖ ఒడిస్సీ నృత్యకారిణీ అయిన డోనా గంగూలీ ఇటీవల కోల్‌కతా ఫిల్మ్ ఫెస్టివల్‌లో ఒక డాన్స్ పెర్ఫామెన్స్ ఇచ్చారు.
ఆమె ప్రదర్శనపై ఆన్‌లైన్‌లో కొందరు అసభ్యకర వ్యాఖ్యలు చేయడంతో బాడీ షేమింగ్ చేశారు. దీంతో డోనా గంగూలీ పోలీసులను ఆశ్రయించారు. సోషల్ మీడియాలో తనపై అనుచితమైన, అవమానకరమైన వ్యాఖ్యలు చేశారని పిటిషన్లో పేర్కొన్నారు. తాను నాలుగున్నర దశాబ్దాలుగా ప్రొఫెషనల్ డ్యాన్సర్‌గా ఉన్నానని, ప్రపంచవ్యాప్తంగా ఒడిస్సీ నృత్యం చేస్తున్నానన్నారు.
ఇటీవల కొంతమంది నెటిజన్లు చేసిన వ్యాఖ్యలు తన గౌరవం, ప్రతిష్టను దెబ్బతీశాయని తెలిపారు. తనను లక్ష్యంగా చేసుకున్న ఒక ఫేస్‌బుక్ పేజీ పేరును కూడా ఆమె పిటిషన్లో పేర్కొన్నారు. తనను అసభ్యకరంగా దూషిస్తూ.. బాడీ షేమింగ్ చేస్తూ పోస్టులు పెట్టిన నిందితులపై కఠిన చర్యలు తీసుకోవాలని ఆమె కోరారు. డోనా ఫిర్యాదు మేరకు ఠాకూర్ పుకూర్ స్టేషన్‌ పోలీసులు ఎఫ్ఐఆర్ ఫైల్ చేసి ఇన్వెస్టిగేషన్ చేస్తున్నామని తెలిపారు. నిందితులను గుర్తించేందుకు కృషి చేస్తున్నామని వెల్లడించారు.
