సూర్యాపేట, వెలుగు: పౌరులు వారి ఓటు హక్కును స్వేచ్ఛగా వినియోగించుకోవడానికి పోలీస్ శాఖ పూర్తి భద్రత, రక్షణ కల్పిస్తుందని ఎస్పీ నరసింహ అన్నారు. ప్రతి ఒక్కరూ ఎన్నికల నియమావళికి లోబడి నడుచుకోవాలని తెలిపారు. ఎన్నికల నిర్వహణకు పోలీసు భద్రత ఉంటుందన్నారు. పంచాయతీ ఎన్నికల సందర్భంగా సూర్యాపేట జిల్లా పోలీసుల ఆధ్వర్యంలో సమస్యాత్మక గ్రామాల్లో ప్రజలకు అవగాహన కల్పిస్తున్నారు. శుక్రవారం ఎస్పీ నరసింహ, సూర్యాపేట డీఎస్పీ ప్రసన్నకుమార్, రూరల్ సీఐ రాజశేఖర్, ఎమ్మార్వో కృష్ణయ్య, ఎంపీడీవో రవిలతో కలిసి యర్కారం గ్రామంలో అభ్యర్థుల నామినేషన్ల ప్రక్రియను పరిశీలించారు.
ఎన్నికలు సజావుగా సాగేలా సిబ్బంది కృషి చేయాలని ఆదేశించారు. అనంతరం గ్రామంలో ప్రజలతో మాట్లాడి ఎన్నికల నియమావళి పట్ల అవగాహన కల్పించారు. ఈ సందర్భంగా ఎస్పీ మాట్లాడుతూ.. ఓటర్లను ప్రలోభాలకు గురి చేయవద్దని కోరారు. ఎన్నికల అనంతరం విజయోత్సవ ర్యాలీలకు పోలీసుల అనుమతి తప్పనిసరన్నారు. అంతరాష్ట్ర చెక్ పోస్ట్‌లలో పటిష్ట నిఘా ఉంచామన్నారు.
