- స్పీకర్ పోచారం శ్రీనివాస్రెడ్డి
కామారెడ్డి , వెలుగు : తెలంగాణ ఇచ్చినోళ్ల గురించి కాదు.. తెచ్చినోళ్ల గురించి చెప్పుకోవాలని స్పీకర్ పోచారం శ్రీనివాస్రెడ్డి అన్నారు. మంగళవారం కామారెడ్డి జిల్లా కేంద్రంలోని ఇందిరాగాంధీ స్టేడియంలో జాతీయ జెండాను ఎగురవేశారు. అనంతరం స్పీకర్ మాట్లాడుతూ కొందరు నేతలు తెలంగాణ తామే ఇచ్చినమని మాట్లాడుతున్నారని, కానీ ఎవరూ మనకు ఇయ్యలేదన్నారు. కేసీఆర్ నాయకత్వంలో పోరాడి తెచ్చుకున్నామన్నారు. దేశానికి స్వాతంత్య్రం తెచ్చిందే మహాత్మాగాంధీ అని, కానీ బ్రిటిష్ వాళ్లు ఇచ్చారని చెప్పుకోవాలా అని ప్రశ్నించారు. మహాత్మాగాంధీ పోరాటానికి భయపడి బ్రిటిష్ వాళ్లు దేశం వదిలిపెట్టి పారిపోయారన్నారు.
పోరాడిన మహాత్మాగాంధీ గురించే చెప్పుకోవాలన్నారు. తెలంగాణ తామే ఇచ్చినమని చెబితే.. మనం బ్రిటిష్ వాళ్లకు కూడా మొక్కాలా అని స్పీకర్ ప్రశ్నించారు. ఇదే విధంగా తెలంగాణ ఇయ్యలే. కేసీఆర్ నాయకత్వంలో పోరాడి తెచ్చుకున్నామన్నారు. స్టేట్ ఏర్పడినప్పుడు కోటి 8 లక్షల ఎకరాల్లో పంటలు సాగయ్యేవని, కానీ ఇప్పుడు 2 కోట్ల 18 లక్షల ఎకరాలు సాగు చేస్తున్నామని చెప్పారు. రైతును రాజు చేసే పక్రియ తెలంగాణలోనే జరుగుతోందని స్పీకర్ అన్నారు.
