కొలంబో: దిత్వా తుఫాను శ్రీలంకలో ప్రళయ తాండవం సృష్టించింది. ఈ తుఫాను ధాటికి శ్రీలంకలో చాలా ప్రాంతాలు నామారూపాల్లేకుండా పోయాయి. ఇండ్లు, రోడ్లు, బ్రిడ్జీలు పూర్తిగా నేలమట్టమయ్యాయి. తుఫాన్ ప్రభావంతో లంకలో 123 మంది చనిపోగా.. వందల సంఖ్యలో జనం గల్లంతయ్యారు. దేశంలో ఎక్కడికక్కడ జనజీవనం స్తంభించిపోయింది. ఈ క్రమంలో దిత్వా తుఫాను కారణంగా తలెత్తిన పరిస్థితిని దృష్టిలో ఉంచుకుని శ్రీలంక అధ్యక్షుడు అనుర కుమార దిస్నాయకే దేశమంతటా అత్యవసర పరిస్థితిని ప్రకటించారు.
ఈ మేరకు శనివారం (నవంబర్ 29) గెజిట్ విడుదల చేశారు. దేశంలో దిత్వా తుఫాను అల్లకల్లోలం సృష్టించడంతో శుక్రవారం (నవంబర్ 28) ప్రతిపక్ష నాయకులతో అధ్యక్షుడు అనుర కుమార దిస్నాయకే అఖిలపక్ష సమావేశం నిర్వహించారు. ఆల్ పార్టీ మీటింగ్లో అత్యవసర పరిస్థితిని ప్రకటించాలని ప్రతిపక్షాలు డిమాండ్ చేశాయి. అలాగే.. వైద్యుల ట్రేడ్ యూనియన్ కూడా దేశంలో అత్యవసర పరిస్థితిని విధించాలని ఒక లేఖ రాశాయి.
ఈ క్రమంలో ప్రతిపక్షాలు, వైద్యుల ట్రేడ్ యూనియర్ సూచన మేరకు దేశమంతటా అత్యవసర పరిస్థితిని విధించారు అధ్యక్షుడు దిస్నాయకే. ఎమర్జెన్సీ ప్రకటించడంతో ప్రస్తుత పరిస్థితిని పరిష్కరించడానికి దళాలు, పోలీసులు, ఆరోగ్య రంగం, పౌర పరిపాలన, పౌర రక్షణ దళాన్ని వేగంగా మోహరించడంతో సహాయ సమన్వయం, సహాయ కార్యకలాపాల ప్రక్రియను వేగవంతం చేసే అవకాశం ఉందని అధికారులు వెల్లడించారు.
