మంచిర్యాల, వెలుగు: నస్పూర్ మండలం సంఘమల్లయ్యపల్లెలో రిసోర్స్ పర్సన్గా పనిచేసిన రమేశ్.. స్ర్తీనిధిలో రూ.50 లక్షలు స్వాహా చేశాడని, ఆ డబ్బులు రికవరీ చేసి తమకు న్యాయం చేయాలని మహిళా సంఘాల సభ్యులు కోరారు. సోమవారం గ్రీవెన్స్లో కలెక్టర్ కుమార్ దీపక్కు విన్నవించారు. బాధితుల కథనం ప్రకారం.. సంఘమల్లయ్యపల్లెలోని మహిళా సంఘాలకు స్ర్తీనిధి నుంచి గతంలో లోన్లు సాంక్షన్ చేశారు. 14 గ్రూపుల నుంచి నెలనెలా కిస్తీలు వసూలు చేసిన ఆర్పీ రమేశ్ ఆ డబ్బులను స్ర్తీనిధిలో జమ చేయకుండా సొంతానికి వాడుకున్నాడు.
మరికొన్ని గ్రూపులకు సంబంధించిన పొదుపు డబ్బులను దుర్వినియోగం చేశాడు. విషయం ఆలస్యంగా బయటపడడంతో అధికారులు విచారణ జరిపి రమేశ్ను తొలగించారు. తాను వాడుకున్న రూ.50 లక్షలు చెల్లిస్తానని బాండ్ పేపర్ రాసిచ్చాడు. ఇప్పటికి రెండేండ్లు గడుస్తున్నా రూ.3 లక్షలు మాత్రమే చెల్లించాడని బాధితులు తెలిపారు. మిగతా డబ్బులు కట్టాలంటూ స్ర్తీనిధి నుంచి తమకు నోటీసులు పంపుతున్నారని వాపోయారు. ఉన్నతాధికారులు స్పందించి డబ్బులను రికవరీ చేసి తమకు న్యాయం చేయాలని వేడుకున్నారు.
