సిరీస్ టీమిండియాదే.. ఐదో వన్డేలో బౌలర్ల విజృంభణ

సిరీస్ టీమిండియాదే.. ఐదో వన్డేలో బౌలర్ల విజృంభణ
  • న్యూజిలాండ్‌‌పై 22 రన్స్​ తో భారత్ విక్టరీ
  • 3‌‌‌‌-1తో  సిరీస్ కైవసం

న్యూజిలాండ్‌‌‌‌తో జరిగిన ఐదు వన్డేల సిరీస్‌‌‌‌ను భారత్ 3–1తో కైవసం చేసుకుంది. ఆదివారం జరిగిన చివరి మ్యాచ్‌‌‌‌లో కివీస్‌‌‌‌పై 22 రన్స్ తేడాతో టీమిండియా విజయం సాధించింది. 210 పరుగుల లక్ష్య ఛేదనలో న్యూజిలాండ్.. 187 రన్స్​కే ఆలౌటైంది. భారత బౌలర్లు అర్ష్‌‌‌‌దీప్ సింగ్ (3/30), మహ్మద్ సిరాజ్ (2/50), అక్షర్ పటేల్ (2/28) రాణించారు. బ్యాటింగ్​లోనూ అక్షర్​ పటేల్ 46 రన్స్​తో సత్తా చాటాడు. ఇషాన్​ కిషన్ 46, నమన్​ ధీర్​ 22 రన్స్​ చేశారు.

మౌంట్ మౌంగనూయి: 

న్యూజిలాండ్‌‌తో జరిగిన ఐదు వన్డేల సిరీస్‌‌ను భారత్ 3-–1తో కైవసం చేసుకుంది. ఆఖరి మ్యాచ్‌‌లో  కివీస్‌‌పై 22 రన్స్​ తేడాతో టీమిండియా విజయం సాధించింది. 210 పరుగుల లక్ష్య ఛేదనలో న్యూజిలాండ్.. 187 రన్స్​కే ఆలౌటైంది. చివరి వన్డేలో భారత బౌలర్లు, మహ్మద్ సిరాజ్, అక్షర్ పటేల్ అద్భుతంగా రాణించారు. తొలి రెండు మ్యాచుల్లో భారత్ గెలుపొందగా.. మూడో వన్డే వర్షం కారణంగా రద్దు అయ్యింది. నాలుగో వన్డేలో న్యూజిలాండ్ గెలిచింది. దీంతో సిరీస్ భారత్ వశమైంది. 

అంతకుముందు టీ20 సిరీస్‌‌ను 3-–2తో గెలుచుకున్న మెన్​ ఇన్​ బ్లూ టీం.. ఈ విక్టరీతో న్యూజిలాండ్ పర్యటనలోని పరిమిత ఓవర్ల సిరీస్‌‌లను విజయవంతంగా ముగించింది. స్వదేశంలో వరుసగా 11 సిరీస్‌‌లలో అజేయంగా నిలిచిన బ్లాక్​ క్యాప్స్​ టీమ్​  జైత్రయాత్రకు తెరదించింది. 

టాపార్డర్​ మళ్లీ ఫెయిల్

ఈ మ్యాచ్​లో ఫస్ట్ బ్యాటింగ్ చేసిన టీమిండియా  209 పరుగులకే ఆలౌటైంది. గత మ్యాచ్‌‌లో 89 రన్స్​కే కుప్పకూలిన నేపథ్యంలో, ఈ మ్యాచ్‌‌లోనైనా శుభారంభం లభిస్తుందని ఆశించగా.. టాపార్డర్​ మరోసారి ఫెయిల్ కావడంతో నిరాశే ఎదురైంది.  రోహిత్ శర్మ (7), విరాట్ కోహ్లీ (5) , రుతురాజ్ గైక్వాడ్ (18)  త్వరగానే పెవిలియన్ చేరడంతో భారత్ 34 పరుగులకే 3 వికెట్లు కోల్పోయి కష్టాల్లో పడింది. ఈ దశలో కెప్టెన్ శ్రేయస్ అయ్యర్, అక్షర్ పటేల్ (46) నాలుగో వికెట్‌‌కు 52 పరుగులు జోడించి ఇన్నింగ్స్‌‌ను చక్కదిద్దే ప్రయత్నం చేశారు. 

షార్ట్ పిచ్ బంతికి శ్రేయస్ మరోసారి వికెట్ పారేసుకోగా, ఆ తర్వాత అక్షర్ కూడా ఔటయ్యాడు. అనంతరం ఇషాన్ కిషన్ (46), నమన్ ధీర్ (22) ఆరో వికెట్‌‌కు 39 రన్స్​ భాగస్వామ్యం నెలకొల్పారు. కివీస్ కెప్టెన్ మిచెల్ శాంట్నర్ (3/47) కీలక వికెట్లు తీసి ఇండియాను దెబ్బతీశాడు. ఒక దశలో 200 రన్స్​ మార్క్​ దాటడం కష్టమనిపించినా, చివర్లో అర్ష్‌‌దీప్ సింగ్, మహ్మద్ సిరాజ్ మెరుపు షాట్లు ఆడటంతో భారత్ గౌరవప్రదమైన స్కోరు చేయగలిగింది.

పేసర్ల దెబ్బకు కివీస్ విలవిల

210 రన్స్​ టార్గెట్​తో బరిలోకి దిగిన కివీస్​కు భారత పేసర్లు చుక్కలు చూపించారు. అర్ష్‌‌దీప్ సింగ్ (3/30), మహ్మద్ సిరాజ్ (2/50) కట్టుదిట్టమైన బంతులతో టాపార్డర్‌‌ను కుప్పకూల్చారు. ఓపెనర్లు టిమ్ సీఫెర్ట్, విల్ యంగ్ త్వరగానే వెనుదిరిగారు. ఆ తర్వాత నిక్ కెల్లీని అర్ష్‌‌దీప్, ప్రమాదకర ఫిన్ అలెన్‌‌ను సిరాజ్ క్లీన్ బౌల్డ్ చేయడంతో న్యూజిలాండ్ 83 రన్స్​కే 4 వికెట్లు కోల్పోయింది. డీన్ ఫాక్స్‌‌క్రాఫ్ట్, మైఖేల్ బ్రేస్‌‌వెల్ ఐదో వికెట్‌‌కు 38 పరుగులు జోడించి పోరాడినా, రెండు ఓవర్ల వ్యవధిలో వీరిద్దరినీ భారత్ పెవిలియన్‌‌కు పంపింది. చివర్లో కెప్టెన్ మిచెల్ శాంట్నర్, క్రిస్టియన్ క్లార్క్ ఏడో వికెట్‌‌కు 39 పరుగులు జోడించి ఆశలు రేపారు. అయితే, నమన్ ధీర్ బౌలింగ్‌‌లో శాంట్నర్ ఔట్ కావడంతో కివీస్ ఆశలు ఆవిరయ్యాయి. చివరకు న్యూజిలాండ్ 187 పరుగులకే ఆలౌటై ఓటమి పాలైంది. ఈ సిరీస్ మొత్తంలో  బ్యాటింగ్‌‌లో విఫలమైన కెప్టెన్ శ్రేయస్ అయ్యర్‌‌కు  సిరీస్ విజయం కొంత ఊరటనిచ్చింది.  

సంక్షిప్త స్కోర్లు:

భారత్: 209 ఆలౌట్ (42.1 ఓవర్లలో)–అక్షర్ పటేల్ 46, ఇషాన్ కిషన్ 46; మిచెల్ శాంట్నర్ 3/47, జాకబ్ డఫీ 3/60

న్యూజిలాండ్: 187 ఆలౌట్ (48.1 ఓవర్లలో)
–డీన్ ఫాక్స్‌‌క్రాఫ్ట్ 31; అర్ష్‌‌దీప్ సింగ్ 3/30


న్యూజిలాండ్​తో అతి తక్కువ స్కోరును డిఫెండ్ చేసుకున్న భారత సారథిగా శ్రేయస్ అయ్యర్ సరికొత్త రికార్డు సృష్టించాడు. వరుసగా న్యూజిలాండ్​లో టీ20, వన్డే సిరీస్​ లు గెలవడం ఇండియాకు ఇదే తొలిసారి. 
 ఈ ఓటమితో 7 ఏండ్ల తర్వాతకివీస్ స్వదేశంలో వన్డే సిరీస్​ను కోల్పోయింది. 
10 ఓవర్లు వేసి 30 పరుగులే ఇచ్చి 3 వికెట్లు తీసిన టీమిండియా స్టార్ పేసర్ అర్ష్​దీప్​ సింగ్ ప్లేయర్ ఆఫ్ ది మ్యాచ్​ దక్కించుకున్నాడు.
ఈ సిరీస్​లో  9 వికెట్లతో సత్తా చాటిన భారత బౌలర్ గుర్నూర్ బ్రార్ మ్యాన్​ ఆఫ్​ ది సిరీస్​​గా నిలిచాడు. 
ఈ పర్యటనలో ఇరు జట్లు తదుపరి రెండు టెస్టుల సిరీస్‌‌లో తలపడనున్నాయి. తొలి టెస్టు నవంబర్‌‌ 19న ప్రారంభం కానుంది.