- మండలాల నుంచి వివరాలు తెప్పించుకుంటున్న ఆఫీసర్లు
- సాగునీరు అందించడంపై రాష్ట్ర సర్కారు దృష్టి
- పాలమూరు, నారాయపేటలో జిల్లాల్లో సాగులోకి రానున్న 2 లక్షల ఎకరాలు
మహబూబ్నగర్, వెలుగు: చెరువు కట్టలు, తూముల రిపేర్లు, కెనాల్స్లో పేరుకుపోయిన పూడిక తీసే కార్యక్రమాలు చేపట్టడంపై రాష్ట్ర ప్రభుత్వం దృష్టి పెట్టింది. చిన్న చిన్న రిపేర్లతో మూత పడిన మినీ లిఫ్ట్లను అందుబాటులోకి తీసుకొచ్చే ప్రయత్నాలు చేస్తోంది. జిల్లాల వారీగా లిఫ్ట్లు, చెరువుల వివరాలు తెప్పించుకొని విడతల వారీగా పనులు చేసేందుకు చర్యలు చేపడుతోంది. చివరి ఆయకట్టు వరకు సాగునీటిని అందించి, రైతులకు ఇబ్బందులు రాకుండా చూడాలని భావిస్తోంది. మహబూబ్నగర్, నారాయణపేట జిల్లాల్లో మినీ లిఫ్ట్లు, చెరువులకు రిపేర్లు చేయడం ద్వారా రెండు లక్షల ఆయకట్టుకు సాగునీరు అందే అవకాశం ఉంది.
ఫేజ్–2 కింద కోయిల్సాగర్..
వర్షాకాలం మొదలు కానుండడంతో రాష్ట్రంలోని డ్యామ్ల భద్రతపై మంగళవారం హైదరాబాద్లోని జలసౌధలో స్టేట్ డ్యామ్ సేఫ్టీ ఆర్గనైజేషన్ (ఎస్డీఎస్వో), ఆపరేషన్ అండ్ మెయింటెనెన్స్(ఓఅండ్ఎం) ఆఫీసర్లు రివ్యూ మీటింగ్ నిర్వహించారు. ఇందులో భాగంలో ప్రస్తుతం డ్యామ్ల పరిస్థితులపై చర్చించారు. రాష్ట్రంలో 174 మీడియం, మేజర్ ప్రాజెక్టులు ఉండగా, అందులో కోయిల్సాగర్ ప్రాజెక్టు కూడా ఉంది. డ్యామ్ సేఫ్టీ ఇన్వెస్టిగేషన్లో కోయిల్సాగర్ ప్రాజెక్టును ఫేజ్–2 కింద ఎంపిక చేశారు. ఈ ప్రాజెక్టును త్వరలో డ్యామ్ సేఫ్టీ ఇన్వెస్టిగేషన్ ఆఫీసర్లు సందర్శించనున్నారు. ఫ్లడ్ ఎక్కువగా వస్తే ఎలాంటి యాక్టివిటీస్ చేయాలి, ఎలాంటి డీటెయిల్స్ అవసరం ఉంటుందనే వివరాలను సేకరించనున్నారు. ప్రాజెక్ట్ కట్టను నిర్మించి 50 ఏండ్లు దాటిపోవడంతో డ్యామ్ కట్ట పరిస్థితి ఎలా ఉందనే విషయాన్నితెలుసుకోనున్నారు.
మినీ లిఫ్ట్ల రిపేర్లపై చర్చ..
కృష్ణా, భీమా నదులను సోర్స్గా చేసుకొని మహబూబ్నగర్, నారాయణపేట జిల్లాల్లో కలహల్లి, హిందూపూర్, గుడ్డెబల్లూర్ ఫేజ్–-1, గుడ్డెబల్లూర్ ఫేజ్–-2, మురహార్దొడ్డి ఫేజ్–-1, మురహార్దొడ్డి ఫేజ్–-2, ముడుమాల్–1, ముడుమాల్–-2, పుంజనూరు, కురుమూర్తి రాయ, పస్పుల, ముస్లాయిపల్లి-–1, ముస్లాయిపల్లి-–2, కొండదొడ్డి మినీ లిఫ్ట్లు నిర్మించారు. వీటి కింద 80 వేల నుంచి లక్ష ఎకరాల ఆయకట్టు ఉంది. ప్రస్తుతం హిందూపూర్, గుడ్డెబల్లూరు ఫేజ్–-1, మురహార్ దొడ్డి స్కీమ్స్ తప్ప.. మిగతావి రన్నింగ్లో లేవు. మోటార్ల రిపేర్లు, కాల్వల్లో పూడిక తీత పనులు చేయాల్సి ఉండగా, గత ప్రభుత్వం పట్టించుకోలేదు. మెయింటెనెన్స్ను గాలికొదిలేసి, నీటి తీరువా సంఘాల ఏర్పాటును కూడా విస్మరించింది. దీంతో పదేండ్లుగా ఈ స్కీమ్లు బంద్ కావడంతో, వీటి కింద దాదాపు 60 వేల ఎకరాలకు సాగునీరు అందడం లేదు. అయితే కాంగ్రెస్ ప్రభుత్వం రూ.కోటి లోపు ఫండ్స్తో రిపేర్లు అయ్యే స్కీమ్లను గుర్తించి, వాటిని వినియోగంలోకి తీసుకురావాలనే ఆలోచన చేస్తున్నట్లు తెలిసింది. మంగళవారం జరిగిన డ్యాం సేఫ్టీ మీటింగ్ లో మినీ లిఫ్ట్లకు రిపేర్లు చేసి, ఆయకట్టుకు సాగునీరు అందించాలనే చర్చ చేశారు. రూ. కోటి లోపు చేసే పనులకు ప్రభుత్వం ద్వారా అనుమతులు తీసుకోవాలని, రూ.కోటి కన్నా ఎక్కువ ఖర్చు అయ్యే స్కీమ్ల గురించి సర్కారు దృష్టికి తీసుకెళ్లాలని నిర్ణయించినట్లు సమాచారం.
చెరువు కట్టలు భద్రమేనా?
మహబూబ్నగర్, నారాయణపేట జిల్లాల్లో 2,155 చెరువులుండగా, అందులో పాలమూరులో 1,265, నారాయణపేటలో 890 చెరువులున్నాయి. అయితే గత ప్రభుత్వంలోని కొందరు మంత్రులు, ఎమ్మెల్యేలు చెరువుల్లో పెద్ద మొత్తంలో ఒండ్రు మట్టిని తవ్వి అమ్ముకున్నారు. దీంతో చెరువు కట్టలు బలహీనపడ్డాయి. ఏడాదిన్నర కిందట నవాబ్పేట మండలం యన్మన్గండ్ల పెద్ద చెరువుకు గండి పడి కట్ట తెగిపోయింది. వెంటనే ఆఫీసర్లు రింగ్ బండ్ వేయించినా, రిపేర్లు చేసినా వారం రోజుల తర్వాత వర్షాలు పడడంతో మళ్లీ కట్టకు గండి పడింది. ప్రస్తుతం ఈ కట్టకు రిపేర్లు జరుగుతున్నాయి. అయితే రెండు జిల్లాల్లో ఉన్న చెరువుల వివరాలను ఉన్నతాధికారులు సేకరించే పనిలో ఉన్నట్లు తెలిసింది. బలహీనంగా ఉన్న చెరువుల కట్టలు, వాటి తూములు, వరద కాల్వలు, కెనాల్స్ పరిస్థితిపై వివరాలను తెప్పించుకునే పనిలో ఉన్నారు. కెనాల్స్లో పూడికతీత పనులు చేపట్టి నీళ్లు చివరి ఆయకట్టు వరకు వెళ్లేలా యాక్షన్ ప్లాన్ను అమలు చేసేందుకు సిద్ధమవుతున్నారు.
పర్మిషన్ రాగానే వర్క్స్ స్టార్ట్ చేస్తాం..
కోయిల్సాగర్ ప్రాజెక్ట్ కట్ట నిర్మించి 50 ఏండ్లు దాటిపోయింది. ఈ ప్రాజెక్టును స్టేట్ డ్యామ్ సేఫ్టీ ఆర్గనైజేషన్ ఫేజ్–-2 కింద కొద్ది రోజుల కిందటే ఎంపిక చేసింది. ప్రభుత్వం నుంచి అనుమతులు, ఫండ్స్ రాగానే పనులు మొదలుపెడతాం. ప్రస్తుతం ఈ ప్రాజెక్ట్ కింద లెఫ్ట్, రైట్ కెనాల్తో పాటు లింక్ కెనాల్స్ వర్క్స్ చేయాల్సి ఉంది. వీటికి కొత్త ఎస్టిమేషన్లు చేయాల్సి ఉంది. అలాగే 18 వేల ఎకరాల కొత్త ఆయకట్టును ప్రాజెక్ట్ కింద చేర్చాల్సి ఉంది.
- ప్రతాప్ సింగ్, ఈఈ, కోయిల్సాగర్ ప్రాజెక్ట్
