వేల గ్రంథాలయాలున్నా.. సిబ్బంది కరవు!

తెలంగాణ రాష్ట్రంలోని ప్రభుత్వ పాఠశాలల్లో విద్యార్థుల అభ్యసన సామర్థ్యాలను మెరుగుపరచడానికి అత్యంత కీలకమైన అడుగు పడాల్సి ఉంది. రాష్ట్రవ్యాప్తంగా వేలాది ప్రభుత్వ పాఠశాలల్లో  లైబ్రరీల పుస్తకాల సెట్‌‌‌‌‌‌‌‌లు అందుబాటులో ఉన్నప్పటికీ, వాటిని  విద్యార్థులకు వినియోగంలోకి తీసుకురావడానికి శాశ్వత లైబ్రేరియన్ పోస్టులు లేకపోవడం విద్యావేత్తలను కలవరపెడుతోంది. లైబ్రరీ సైన్స్ కోర్సులు పూర్తి చేసిన అభ్యర్థులు, రాబోయే DSC (డిస్ట్రిక్ట్ సెలక్షన్ కమిటీ) నోటిఫికేషన్‌‌‌‌‌‌‌‌లో ఈ పోస్టులను చేర్చాలని చారిత్రక ఉత్తర్వులు, విద్యా కమిషన్ సిఫారసులు ఉన్నాయి.

21,519 పాఠశాలల్లో గ్రంథాలయాలు

రాష్ట్ర శాసన సభకు సమర్పించిన అధికారిక నివేదికల (మార్చి 24–2025 నాటికి) ప్రకారం, తెలంగాణలోని 21,519 పాఠశాలల్లో లైబ్రరీ పుస్తకాల సెట్‌‌‌‌‌‌‌‌లు అందుబాటులో ఉన్నాయి. ఈ గ్రంథాలయాల నిర్వహణకు ప్రత్యేక సిబ్బంది లేకపోవడంతో, పుస్తకాలు మూలనపడే పరిస్థితి ఏర్పడుతోంది.

నిర్ణయం పెండింగ్​లో ఉంది!

సంగారెడ్డి జిల్లా విద్యా శాఖాధికారి (DEO) కార్యాలయం నుండి అందిన సమాచారం ప్రకారం, ప్రభుత్వ పాఠశాలల్లో లైబ్రేరియన్ పోస్టుల నియామక నోటిఫికేషన్ జారీ చేసే అధికారం డైరెక్టర్ ఆఫ్ స్కూల్ ఎడ్యుకేషన్, తెలంగాణ పరిధిలో ఉందని తేలింది. దీంతో, పోస్టుల భర్తీకి ఉన్న అడ్డంకులు తొలగి, కేవలం ప్రభుత్వ నిర్ణయం మాత్రమే పెండింగ్‌‌‌‌‌‌‌‌లో ఉందని తెలుస్తోంది. తెలంగాణ గురుకుల పాఠశాలల్లో ఇప్పటికే లైబ్రేరియన్లను నియమించిన విధంగానే,  దేశంలోని అనేక రాష్ట్రాలు తమ ప్రభుత్వ పాఠశాలల్లో విద్యా ప్రమాణాల పెంపు కోసం లైబ్రేరియన్ పోస్టులను భర్తీ చేశాయి. ఇది రాష్ట్ర విద్యావ్యవస్థలో సంస్కరణలకు సూచనగా నిలుస్తోంది. పాఠశాలల్లో లైబ్రేరియన్ పోస్టులు భర్తీ చేయడం వల్ల విద్యార్థులు, పాఠశాలలకు ఎన్నో లాభాలు చేకూరుతాయి.

పఠనాభివృద్ధి 

లైబ్రేరియన్ల పర్యవేక్షణలో విద్యార్థులకు వారి స్థాయికి తగిన పుస్తకాల ఎంపిక, సమర్థవంతమైన వినియోగంపై మార్గనిర్దేశం లభిస్తుంది. ఇది వారి పఠనాభివృద్ధి (Reading Skills) ని పెంచుతుంది.  జ్ఞాన కేంద్రం (Knowledge Hub) గ్రంథాలయం కేవలం పుస్తకాల గిడ్డంగిగా కాకుండా, సమాచారాన్ని, జ్ఞానాన్ని అందించే సజీవ అభ్యసన కేంద్రంగా మారుతుంది. ఇది విద్యార్థులలో పరిశోధన, ప్రశ్నించే తత్వాన్ని పెంచుతుంది.  ప్రస్తుతం టీచర్లే లైబ్రరీ బాధ్యతలను అదనంగా చూడాల్సి వస్తోంది. 

లైబ్రేరియన్ నియామకంతో ఉపాధ్యాయులు బోధనపై పూర్తిగా దృష్టి పెట్టే అవకాశం లభిస్తుంది.  డిజిటల్ అక్షరాస్యత లైబ్రేరియన్లు ఆధునిక టెక్నాలజీ, డిజిటల్ రిసోర్సెస్‌‌‌‌‌‌‌‌ని విద్యార్థులకు అందుబాటులోకి తీసుకురావడం ద్వారా వారిలో డిజిటల్ అక్షరాస్యత (Digital Literacy) ను పెంచగలరు.  ఆత్మవిశ్వాసం, సృజనాత్మకత పాఠ్యపుస్తకాలకు మించిన సాహిత్యం, కథలు, సైన్స్ పుస్తకాల అందుబాటుతో విద్యార్థులలో సృజనాత్మకత (Creativity) పెరిగి, ప్రపంచ జ్ఞానంపై అవగాహన పెరుగుతుంది. 

డీఎస్​సీలో  లైబ్రేరియన్ల పోస్టులు భర్తీ చేయాలి 

ప్రభుత్వం ఇప్పటికే గురుకుల పాఠశాలల్లో అమలు చేస్తున్న నియామక విధానాన్ని సాధారణ పాఠశాలలకు కూడా వర్తింపజేయాలి. 21,519 ప్రభుత్వ పాఠశాలల్లో నిరుపయోగంగా ఉన్న గ్రంథాలయాలను సద్వినియోగం చేసుకోవాలంటే లైబ్రేరియన్ పోస్టులను తక్షణమే మంజూరు చేసి, రాబోయే DSC నోటిఫికేషన్‌‌‌‌‌‌‌‌లో తప్పనిసరిగా చేర్చాలి. ఇది  లైబ్రరీ సైన్స్ అభ్యర్థులే కాదు  విద్యాభిమానులు కూడా ప్రభుత్వాన్ని కోరుతున్నారు.  విద్యారంగంలో గుణాత్మక మార్పునకు ఇది అత్యంత అవసరం.

సీఎం చెప్పినట్లుగా..

తెలంగాణ రాష్ట్ర ప్రభుత్వం విద్యా వ్యవస్థ మార్పు చేయాలి.  ప్రభుత్వ పాఠశాలల్లో కూడా లైబ్రేరియన్ పోస్టులు భర్తీ చేయాలి.  లైబ్రేరియన్ ప్రతి ప్రభుత్వ పాఠశాలలో ఉపాధ్యాయ పోస్టులుతో పాటు లైబ్రేరియన్ DSC నోటిఫికేషన్​లో విడుదల చేయాల్సిన అవసరం ఉంది. దానివల్ల విద్యార్థులు నాణ్యమైన విద్యలో మార్పు జరుగుతుంది.  కావున మన తెలంగాణ ప్రభుత్వం ప్రభుత్వ పాఠశాలల్లో  లైబ్రేరియన్ పోస్టులు భర్తీ  చేయాల్సిన ఆవశ్యకతను  ప్రభుత్వం గుర్తించాలి. 

విద్య అనేది మాత్రమే మన జీవితాన్ని మార్పు చేస్తుంది అని చెప్పిన ముఖ్యమంత్రి  విద్యా శాఖ లో సమస్య పరిష్కారం మీద సంస్కరణలు చేయాల్సిన అవసరం వుందని గురుకుల పాఠశాలలు మాదిరిగా ప్రభుత్వ పాఠశాలల్లో  లైబ్రేరియన్ పోస్టులు భర్తీ DSC లో చేయాలి.   మన తెలంగాణ ముఖ్యమంత్రి ఈ కీలక నిర్ణయం తీసుకోవాలి. దీని వల్ల విద్యార్థుల జీవితంలో వెలుగు నింపిన ముఖ్యమంత్రిగా చరిత్రలో మిగిలిపోతారు.

 చారిత్రక జీవోలు 

(1998 & 2005). ఉమ్మడి ఆంధ్రప్రదేశ్ రాష్ట్రంలోనే ప్రభుత్వ పాఠశాలల్లో లైబ్రేరియన్ పోస్టుల భర్తీ కోసం రెండు కీలక ప్రభుత్వ ఉత్తర్వులు జారీ అయ్యాయి. G.O. Ms. No. 538 (20-11-1998). G.O. Ms. No. 96 (25-07-2005). ఈ ఉత్తర్వులు ఉన్నప్పటికీ, నియామకాలు మాత్రం జరగలేదు. 1998 జీవో ప్రకారం హైస్కూళ్లలో లైబ్రేరియన్ పోస్టులను డైరెక్ట్ రిక్రూట్‌‌‌‌‌‌‌‌మెంట్ ద్వారా భర్తీ చేసేందుకు నిబంధనలు ఉన్నాయి. ప్రభుత్వ పాఠశాలల విద్యాప్రమాణాలపై అధ్యయనం చేసిన ఆకునూరి మురళీ నేతృత్వంలోని తెలంగాణ విద్యా కమిషన్ కూడా పాఠశాలల్లో లైబ్రరీలకు ప్రత్యేకంగా లైబ్రేరియన్ పోస్టులను భర్తీ చేయాలని స్పష్టంగా సిఫారసు చేసింది. 

రాజు