మహదేవపూర్, వెలుగు : 8 నెలలుగా జీతాలు ఇవ్వకపోవడంతోఆగ్రహించిన వర్కర్లు సమ్మెలోకి వెళ్లగా, హాస్టల్ స్టూడెంట్స్ ను పస్తులుంచలేక టీచర్లు వండిపెట్టారు. స్టూడెంట్లు హెల్పర్లుగా మారి వంట వండేందుకు సాయం చేశారు. జయశంకర్ భూపాలపల్లి జిల్లా మహదేవపూర్ మండలంలోని 8 ట్రైబల్ వెల్ఫేర్ గురుకులాల్లో ఈ పరిస్థితి వచ్చింది. తెలంగాణ రాష్ట్ర గిరిజన, సంక్షేమ ఆశ్రమ పాఠశాలల్లో పని చేస్తున్న డెయిలీ వేజ్ వర్కర్లకు 8 నెలలుగా జీతాలు రావడం లేదు. దీంతో మహదేవపూర్ సబ్ డివిజన్ పరిధిలోని 8 హాస్టల్స్ లో పనిచేస్తున్న వర్కర్స్20 రోజులుగా వంట చేస్తూ ఖాళీ సమయాల్లో నిరసన తెలుపుతున్నారు. కానీ అధికారులు గానీ, ప్రజాప్రతినిధులు గానీ పట్టించుకోవడం లేదు.
దీంతో తప్పనిసరి పరిస్థితుల్లో గురువారం నుంచి సమ్మెలోకి వెళ్లామని డెయిలీ వేజ్ వర్కర్ల భూపాలపల్లి జిల్లా వైస్ ప్రెసిడెంట్ భూక్య శ్రీనివాస్ చెప్పారు. వర్కర్లు డ్యూటీకి రాకపోవడంతో పిల్లలను పస్తులుంచలేక అన్ని చోట్ల టీచర్లే గరిట తిప్పారు. ఉదయం టిఫిన్, మధ్యాహ్నం, రాత్రి భోజనం కూడా స్టూడెంట్లు , టీచర్లే వండుకున్నారు. స్టూడెంట్లు బియ్యం కడిగి, కూరగాయలు కోసి ఇచ్చి సాయపడ్డారు. ప్రతి రోజూ ఇలా వండడం సాధ్యం కాదని, తమ చదువులు దెబ్బతింటాయని, వెంటనే వర్కర్ల సమస్యలు పరిష్కరించి పనిలోకి వచ్చేలా చూడాలని స్టూడెంట్స్, టీచర్లు సర్కారుకు విజ్ఞప్తి చేశారు.
