- పాపులర్ బ్రాండ్లనూ వెనక్కి నెట్టేస్తున్నయ్
న్యూఢిల్లీ: తిండి, డ్రింక్స్, బ్యూటీ, పర్సనల్ కేర్ సెగ్మెంట్లకు చెందిన ఎమర్జింగ్/ఇన్సర్జెంట్ బ్రాండ్లకు దండిగా ఇన్వెస్ట్మెంట్లు వస్తున్నాయి. తక్కువ ధరలకు క్వాలిటీ ప్రొడక్టులను అందించే వాటిని ‘ఇన్సర్జెంట్ బ్రాండ్లు’ అని పిలుస్తారు. 2018 నుంచి 2022 వరకు ప్రైవేట్ ఈక్విటీ వెంచర్ క్యాపిటల్ ఫండ్‌లు ఇన్వెస్ట్ చేసిన 4.7 బిలియన్ల డాలర్లలో 75 శాతానికిపైగా వీటికే వచ్చాయి. ఇటువంటి బ్రాండ్లకు పట్టణాల నుంచి విపరీతంగా డిమాండ్ పెరుగుతోందని బైన్ & కో, డీఎస్జీ కన్జూమర్ పార్ట్నర్స్ ‘ది ఇన్సర్జెంట్ కన్జూమర్ బ్రాండ్స్ ప్లేబుక్’ పేరుతో విడుదల చేసిన రిపోర్ట్ పేర్కొంది. 2007 తర్వాత వచ్చిన ఇన్సర్జెంట్ బ్రాండ్‌‌లను పరిశీలించి రిపోర్ట్ తయారు చేసింది. 2015 నుండి మొత్తం 3 మిలియన్ డాలర్లకు పైగా నిధులను ఇవి అందుకున్నాయి.
వీటిలో మెజారిటీ బ్రాండ్లు ఆన్‌‌లైన్‌‌లో ప్రారంభమయ్యాయి. ఇవి వినూత్నమైన ప్రొడక్టులను అందించడంతో గిరాకీ పెరుగుతోంది. “సుమారు 150 ఇన్సర్జెంట్ బ్రాండ్‌‌లపై మేం స్టడీ చేశాం. ప్రీమియమైజేషన్, కొత్త కేటగిరీలు రావడం వల్ల ఈ సెగ్మెంట్మరింత వృద్ధి చెందుతోంది. 2022 నుండి 2030 వరకు కన్జంప్షన్ గ్రోత్లో వీటి వాటా 45 శాతం వరకు ఉండొచ్చు. ఇవి కొత్త కస్టమర్లపై ఎక్కువగా ఫోకస్ చేస్తున్నాయి. సాధారణ బ్రాండ్ల మార్కెట్ వృద్ధితో పోలిస్తే ఇన్సర్జెంట్ బ్రాండ్లు సగటున రెండు లేదా మూడు రెట్లు వేగంగా వృద్ధి చెందుతున్నాయి. భారతదేశంలో విజయవంతమైన ఎమర్జింగ్ బ్రాండ్లు నిధులను భారీగా సమీకరించుకుంటూనే డబ్బు సంపాదించుకుంటున్నాయి. ఇవి వినియోగదారుల మనసుల్లో ప్రత్యేక స్థానాన్ని సాధించాయి" అని బైన్ & కో పార్ట్నర్ ధృవ్ అగర్వాల్ అన్నారు.
పట్టణాల్లో ఎక్కువ గిరాకీ..
కొత్త బ్రాండ్‌‌లను కోరుకునే పట్టణ వినియోగదారుల వల్ల ఇటువంటి బ్రాండ్లు పాపులర్ అవుతున్నాయి. గత నాలుగు సంవత్సరాల్లో అప్పర్ మిడిల్, హై ఇన్కమ్ వర్గాల నుంచి వీటికి భారీ సంఖ్యలో కస్టమర్లు వచ్చారు. ఈ సంఖ్య దాదాపు 15.7 కోట్ల వరకు ఉంటుందని అగర్వాల్ వివరించారు. ఈ కొత్త బ్రాండ్లు పాపులర్ బ్రాండ్లకు విపరీతంగా పోటీని ఇస్తున్నాయి. మన దేశంలో ఏదైనా బ్రాండ్ రూ.75 కోట్ల వార్షిక ఆదాయాన్ని సాధించడానికి సుమారు ఆరు సంవత్సరాలు పడుతోంది. కానీ, ఆ తరువాతి రెండు సంవత్సరాల్లో మెజారిటీ బ్రాండ్లు రూ.200 కోట్ల వార్షిక ఆదాయ మార్కును చేరుకుంటున్నాయి. అంటే కుదుట పడ్డాక గ్రోత్ వేగంగా ఉంటోంది. “ఒకసారి బలమైన పునాదులు పడ్డాక వృద్ధి వేగంగా ఉంటుంది. దీర్ఘకాలిక లాభదాయకత, పోటీని తట్టుకోవడం, వృద్ధి ఒత్తిళ్లను అధిగమించడానికి స్థూల మార్జిన్‌‌పై ముందస్తుగా దృష్టి పెట్టడం చాలా కీలకం. వీటిలో తేడా వస్తే వ్యాపారాన్ని మూసుకోవాల్సి ఉంది. ఏ బ్రాండైనా వీలైనాంత త్వరగా లాభాల్లోకి రావాలి" అని డీఎస్జీ కన్జూమర్ పార్ట్నర్స్ మేనేజింగ్ డైరెక్టర్ హరిహరన్ ప్రేమ్‌‌కుమార్ అన్నారు.
