రాజ్యసభలో చైర్మన్ వెంకయ్య నాయుడు
న్యూఢిల్లీ: నిర్భయ దోషులకు కోర్టు విధించిన ఉరిశిక్షను వీలైనంత తొందరగా అమలుచేయాలని ఉపరాష్ట్రపతి వెంకయ్య నాయుడు అన్నారు. ఉరిశిక్ష అమలు పదేపదే వాయిదా పడడంపై ఆయన రాజ్యసభలో స్పందించారు. ఈ విషయం సున్నితం, సీరియస్ కూడా అని ఆయన కామెంట్ చేశారు. ఈమేరకు మంగళవారం సభలో ఆప్ ఎంపీ సంజయ్ సింగ్ మాట్లాడుతూ.. నిర్భయ దోషులు నలుగురికి కోర్టు ఉరి శిక్ష విధించిందన్నారు. అయితే, శిక్ష అమలు మాత్రం వాయిదా పడుతోందని చెప్పారు. ఈ కేసులో రాష్ట్రపతి కానీ సుప్రీంకోర్టు కానీ జోక్యం చేసుకొని శిక్ష త్వరగా అమలయ్యేలా చూడాలని సంజయ్ కోరారు.
2012లో నిర్భయపై అత్యాచారం జరిగినపుడు దేశం మొత్తం రోడ్డెక్కి ఆందోళనలు చేసిందని గుర్తుచేశారు. ఇప్పుడు శిక్ష వాయిదా పడుతుంటే ప్రజల్లో ఆగ్రహం వ్యక్తమవుతోందని చెప్పారు. ఈ పరిస్థితిని కొనసాగించడం మంచిదికాదని, దోషులను వెంటనే ఉరి తీయాలని సంజయ్ డిమాండ్ చేశారు. అంతకుముందు సభలో సీఏఏ, ఎన్నార్సీ, ఎన్పీఆర్లకు వ్యతిరేకంగా నినాదాలు చేస్తున్న టీఎంసీ, కాంగ్రెస్ ఎంపీలు కూడా ఈ చర్చ సందర్భంగా సైలెంట్అయ్యారు.
