చాక్పీస్, చీపురుకట్టకూ చెక్ రాయాల్సిందే!
స్కూల్ గ్రాంట్స్ ఖర్చులో సర్కారు కొత్త రూల్స్
నాగర్ కర్నూల్, వెలుగు : సర్కారు బడిలో బోర్డుపై రాసేందుకు రూ.50 పెట్టి చాక్పీస్ల బాక్స్ కొనాలన్నా, రూంలు ఊడ్చేందుకు రూ.100 పెట్టి చీపురుకట్ట కొనాలన్నా చెక్పేమెంట్ ద్వారానేచేయాలట! స్కూల్గ్రాంట్స్ ఖర్చు చేసేందుకు సర్కారు పెట్టిన ఈ కొత్త నిబంధనలతో హెచ్ఎంలతోపాటు స్కూల్మెయింటనెన్స్కమిటీ చైర్మన్లు తిప్పలు పడ్తున్నారు. తెలంగాణ వచ్చాక స్కూల్గ్రాంట్, స్కూల్మెయింటనెన్స్ గ్రాంట్లను తగ్గించిన రాష్ట్ర సర్కారు, ప్రస్తుతం ఇస్తున్న పదో, పరకో పైసల ఖర్చుకు పెట్టిన కొత్త రూల్స్పై సర్వత్రా విమర్శలు వ్యక్తమవుతున్నాయి.
ఇచ్చేదే అరకొర నిధులు..
తెలంగాణ ఏర్పాటుకు ముందు స్కూల్ గ్రాంట్, మెయింటనెన్స్ గ్రాంట్స్కింద స్టూడెంట్ల సంఖ్యతో సంబంధం లేకుండా ప్రైమరీ స్కూళ్లకు ఏడాదికి రూ.20వేల దాకా, యూపీఎస్లకు రూ.20 నుంచి రూ.25వేల దాకా, హైస్కూళ్లకు రూ.25 నుంచి రూ.35వేల దాకా కేంద్ర, రాష్ట్ర ప్రభుత్వాల నుంచి వచ్చేది. రాష్ట్ర ఏర్పాటు తర్వాత స్టూడెంట్ల సంఖ్యను బట్టి స్కూల్మెయింటెన్స్ గ్రాంట్ ఇస్తున్నారు. 50లోపు స్టూడెంట్లుంటే రూ.10వేలు, 50 నుంచి 100 మంది స్టూడెంట్స్ ఉంటే రూ.20వేలు, 100 నుంచి 150 మంది స్టూడెంట్స్ ఉంటే రూ.30వేలు, 150, ఆపైన స్టూడెంట్లు ఉంటే రూ.40వేలు ఇస్తున్నారు. ఈ పైసలతో జెండా పండుగలు, ఇతర దినోత్సవాలు నిర్వహించడంతో పాటు, రిజిస్టర్లు, రికార్డులు, చాక్పీసులు, పెన్నులు, ఎగ్జామ్ పేపర్లు, చీపుర్లు, ఫినాయిల్.. ఇలా సర్వం కొనాల్సి ఉంటుంది.
సవాలక్ష నిబంధనలు..
గతంలో స్కూళ్లకు దగ్గరలో ఉన్న బ్యాంకులో స్కూల్మేనేజ్మెంట్కమిటీ(ఎస్ఎంసీ) చైర్మన్కు, హెచ్ఎంకు జాయింట్ అకౌంట్ తీసుకుంటే, సర్కారు నుంచి వచ్చే పైసలు అందులో పడేవి. ఎస్ఎంసీ తీర్మానం తర్వాత స్కూల్ గ్రాంట్స్, మెయింటన్స్ డబ్బులను అకౌంట్ నుంచి తీసుకొని ఖర్చు పెట్టుకునేవారు. కానీ, ఇప్పుడు మారిన రూల్స్ ప్రకారం.. డబ్బులను హెచ్ఎం, ఎస్ఎంసీ చైర్మన్ విత్డ్రా చేయడానికి లేదు. కేవలం కెనరా బ్యాంకులో మాత్రమే స్కూల్అకౌంట్ తీయాలని, అన్నింటికీ చెక్కు రూపంలోనే చెల్లించాలని రూల్పెట్టారు. పది రూపాయల ఖర్చయినా దాన్ని చెక్కు ద్వారా చేయాల్సిందే. ఎవరూ చెక్లు తీసుకోకపోవడంతో హెచ్ఎంలు తలపట్టుకుంటున్నారు. ప్రతి చిన్న ఖర్చుకూ చెక్ పట్టుకొని కిలోమీటర్ల దూరం వెళ్తున్నారు.
స్కూల్కు పెట్టాల్సిన ఖర్చు చిన్నదే అయినా బ్యాంక్దాకా వెళ్లేందుకే ఎక్కువ ఖర్చు అవుతోందని హెచ్ఎంలు వాపోతున్నారు. రాష్ట్రవ్యాప్తంగా అన్ని స్కూళ్లలో ఇదే పరిస్థితి నెలకొంది. మోడల్ స్కూల్స్, ట్రైబల్ స్కూల్స్, స్పోర్ట్స్స్కూళ్లకు సైతం ఈ రూల్విధించారు. కాగా, ఈ అకడమిక్ఇయర్కు సంబంధించిన డబ్బులు నవంబర్లో విడుదలయ్యాయి. అప్పటికే ఆరు నెలలు గడిచిపోవడంతో హెచ్ఎంలు తమ జేబుల్లోంచి మెయింటనెన్స్ పెట్టుకున్నారు. ఇప్పుడు వారు ఖర్చు పెట్టిన డబ్బును కూడా వెనక్కి తీసుకునే పరిస్థితి లేకుండా పోయిందని వాపోతున్నారు.
