- నోటీసు ఇచ్చేందుకు సొంత పార్టీ కౌన్సిలర్ల ప్లాన్
జడ్చర్ల, వెలుగు : బీఆర్ఎస్ కు చెందిన జడ్చర్ల మున్సిపల్ చైర్పర్సన్ను గద్దె దింపేందుకు ఆ పార్టీ కౌన్సిలర్లే ప్లాన్ చేస్తున్నారు. ఇప్పటికే సమావేశమైనవారు, రెండు, మూడు రోజుల్లో అవిశ్వాస తీర్మానం ప్రవేశ పెట్టేందుకు సిద్ధమవుతున్నట్లు సమాచారం. జడ్చర్ల మున్సిపాల్టీలో 27 మంది కౌన్సిలర్లు ఉండగా, అందులో బీఆర్ఎస్నుంచి 20 మంది, కాంగ్రెస్ నుంచి ఆరుగురు, బీజేపీ నుంచి ఒకరు ఎన్నికయ్యారు. చైర్ పర్సన్గా దోరేపల్లి లక్ష్మి, వైస్ చైర్పర్సన్గా పాలాది సారికను ఎన్నుకున్నారు. పాలకవర్గంపై రెండేండ్ల నుంచి అవినీతి ఆరోపణలు వస్తున్నాయి.
బీఆర్ఎస్ కౌన్సిలర్లు, చైర్పర్సన్ వర్గీయుల మధ్య విభేదాలు కొనసాగుతున్నాయి. చైర్పర్సన్ వర్గీయుల ఒంటెద్దు పోకడతో తాము నష్టపోతున్నామని మాజీ ఎమ్మెల్యే, బీఆర్ఎస్ జిల్లా అధ్యక్షుడు సి.లక్ష్మారెడ్డి దృష్టికి పలువురు కౌన్సిలర్లు తీసుకెళ్లినా ఫలితం లేకుండా పోయింది. దీంతో అసంతృప్తికి గురైన ఆ పార్టీకి చెందిన 19 మంది కౌన్సిర్లు అవిశ్వాసం పెట్టేందుకు సిద్ధమవుతున్నట్లు తెలిసింది.
నాలుగు రోజుల కింద రహస్యంగా సమావేశమై అవిశ్వాసంపై మాజీ ఎమ్మెల్యేతో చర్చించినట్లు సమాచారం. ఆయన దీనికి మద్దతు ఇవ్వకపోవడంతో పాటు కౌన్సిలర్ల సొంత నిర్ణయానికే వదిలేసినట్లు ఓ కౌన్సిలర్ ద్వారా తెలిసింది. రెండు, మూడు రోజుల్లో నిర్ణయం తీసుకొని, ఒకేసారి చైర్పర్సన్, వైస్ చైర్పర్సన్పై అవిశ్వాసం నోటీసులు ఇచ్చేందుకు రంగం సిద్ధం చేసుకుంటున్నట్లు తెలిసింది.
