కర్ణాటకలో క్యాంపు రాజకీయాలు లేవని.. తనకూ, సీఎం సిద్ధరామయ్యకు మధ్య విబేధాలు లేవన్నారు డిప్యూటీ సీఎం డీకే శివకుమార్. ఇద్దరం కలిసి పనిచేస్తామని చెప్పారు. 2025, నవంబర్ 29 వ తేదీన ఉదయం సీఎం సిద్ధరామయ్య ఇంట్లో ఇరువురు నేతలు బ్రేక్ ఫాస్ట్ మీటింగ్ లో పాల్గొన్నారు. దాదాపు 40 నిమిషాల పాటు బ్రేక్ ఫాస్ట్ మీటింగ్ సాగింది. ఈ సందర్భంగా ఇద్దరు నేతలు ప్రెస్ మీట్ నిర్వహించారు.
హైకమాండ్ నిర్ణయాన్ని శిరసావహిస్తాం: డీకే శివకుమార్
హైకమాండ్ నిర్ణయాన్ని శిరసావహిస్తామని ఈ సందర్భంగా డీకే శివకుమార్ చెప్పారు. అందుకు విరుద్ధంగా ఒక్క మాట కూడా మాట్లాడమని అన్నారు. బ్రేక్ ఫాస్ట్ మీటింగ్ లో కర్ణాటక ప్రధాన్యాలపై చర్చించినట్లు చెప్పారు. ఈ మీటింగ్ ద్వారా తామిద్దరం కలిసికట్టుగా ఉన్నామనే సందేశం ఇస్తున్నామని తెలిపారు.
కర్ణాటక ప్రజలు తమపై సంపూర్ణ విశ్వాసంతో ఉన్నారని.. ప్రజలకు ఇచ్చిన హామీలు నెరవేర్చడమే లక్ష్యమని అన్నారు డీకే. పార్టీని పటిష్టం చేయడమే అత్యంత ప్రాధాన్యమని చెప్పారు. త్వరలో సీఎం సిద్ధరామయ్య తమ ఇంటికి డిన్నర్ కు వస్తారని తెలిపారు. మీటింగ్ పూర్తైన సందర్భంగా మధ్యాహ్నం ఢిల్లీ వెళ్లనున్నారు డీకే.
అప్పుడూ, ఎప్పుడూ, ఎప్పటికీ విభేదాలు ఉండవు: సీఎం సిద్ధరామయ్య
తమ ఇద్దరి మధ్య ఎలాంటి భేదాభిప్రాయాలు అప్పుడు, ఇప్పుడు, ఎప్పుడూ లేవన్నారు సీఎం సిద్ధరామయ్య. తాము హైకమాండ్ నిర్ణయాన్ని గౌరవిస్తామని చెప్పారు. డీకేతో బ్రేక్ ఫాస్ట్ చేయాలని కేసీ వేణుగోపాల్ చెప్పారని.. అందులో భాగంగా బ్రేక్ ఫాస్ట్ మీటింగ్ ఏర్పాటు చేసినట్లు తెలిపారు. గందరగోళానికి ఫుల్ స్టాప్ పెట్టాలనే బ్రేక్ ఫాస్ట్ మీటింగ్ ఏర్పాటు చేసినట్లు తెలిపారు. మీటింగ్ లో 2028 ఎన్నికల స్ట్రాటజీపై చర్చించినట్లు తెలిపారు. 2028 లోగెలవడమే తమకు ముఖ్యని అన్నారు. తామిద్దరం కలిసి కట్టుగా బీజేపీ, జేడీఎస్ పై పోరాటం చేస్తున్నామని అన్నారు. కాంగ్రెస్ ప్రభుత్వంపై బీజేపీ అవిశ్వాస తీర్మానం పెట్టడం అసాధ్యమని ఈ సందర్భంగా అన్నారు సీఎం సిద్ధరామయ్య.
