- నిజామాబాద్ జిల్లా బోధన్లోని
- బీసీ బాయ్స్ హాస్టల్లో ఘటన
- పోలీస్ స్టేషన్ ఎదుట విద్యార్థి సంఘాల ఆందోళన
బోధన్, వెలుగు: నిజామాబాద్ జిల్లా బోధన్ టౌన్లోని బీసీ బాయ్స్ హాస్టల్లో డిగ్రీ స్టూడెంట్ హత్యకు గురయ్యాడు. నకల్ కొట్టొద్దని, కష్టపడి చదువుకోవాలని మందలించినందుకు ఇంటర్ స్టూడెంట్స్ మూకుమ్మడిగా దాడి చేశారు. దీంతో హాస్టల్ రూమ్లోనే డిగ్రీ విద్యార్థి ప్రాణాలు కోల్పోయాడని ఏసీపీ శ్రీనివాస్ తెలిపారు. కేసు వివరాలుసోమవారం ఆయన మీడియాకు వెల్లడించారు. కామారెడ్డి జిల్లా గాంధారి మండలం తిప్పారంతండాకు చెందిన హరిహలబస్సీ వెంకట్ (20) బోధన్లోని గవర్నమెంట్ డిగ్రీ కాలేజ్లో బీఏ ఫైన లియర్ చదువుతున్నాడు.
తట్టికోట్లో ఉన్న బీసీ బాయ్స్ హాస్టల్లో ఉంటున్నాడు. ఆదివారం రాత్రి 9గంటలకు వార్డెన్ స్వామి వెళ్లిపోయి.. హాస్టల్ బాధ్యతలను వెంకట్కు అప్పగించాడు. స్టడీ అవర్లో అనిల్ అనే స్టూడెంట్ ఇంటర్ ఎగ్జామ్స్ కోసం నకల్ చీటీలు కట్ చేసుకుంటున్నాడు. నకల్ కొట్టొద్దని అనిల్ను వెంకట్ మందలించాడు. ఈ విషయాన్ని అనిల్ తన సోదరుడు దిలీప్ అతని ఫ్రెండ్ పరమేశ్కు చెప్పాడు. అనిల్, దిలీప్ కలిసి తమ స్నేహితులు కృష్ణ, శివ, లక్ష్మణ్తో రాత్రి 11 గంటలకు వెంకట్ రూమ్కు వెళ్లారు.
అప్పటికే పడుకున్న అతనిపై అందరూ కలిసి దాడి చేశారు. వెంకట్ స్పృహ తప్పి పడిపోవడంతో ఫిట్స్ వచ్చాయంటూ గవర్నమెంట్ హాస్పిటల్కు తరలించారు. పరీక్షించిన డాక్టర్లు.. వెంకట్ అప్పటికే చనిపోయాడని చెప్పారు. దీంతో ఐదుగురు అక్కడి నుంచి పరారయ్యారు. తర్వాత పోలీసులు వారితో పాటు వారికి సహకరించిన పరమేశ్ను అరెస్ట్ చేశారు.
వెంకట్ హత్యకు నిరసనగా అతని తల్లిదండ్రులు, బంధువులు, స్టూడెంట్ యూనియన్ నాయకులు పోలీస్ స్టేషన్ ముందు ఆందోళనకు దిగారు. వార్డెన్ స్వామిని సస్పెండ్ చేయాలని, మృతుడి కుటుంబంలోని ఒకరికి గవర్నమెంట్ జాబ్, రూ.50 లక్షల ఎక్స్గ్రేషియా ప్రకటించాలన్నారు. అధికారులు వార్డెన్ స్వామిని సస్పెండ్ చేశారు. బాధిత కుటుంబంలో ఒకరికి హాస్టల్లో తాత్కాలికంగా ఉద్యోగం కల్పిస్తూ ఉత్తర్వులు జారీ చేశారని పీడీఎస్యూ జిల్లా అధ్యక్షుడు ఆర్.గౌతమ్ కుమార్, ఏఐఎస్బీ జిల్లా అధ్యక్షుడు నాగరాజు, యూఎస్ఎఫ్ఐ జిల్లా కార్యదర్శి సంజయ్ తెలిపారు.
